Khlad u para jong u MLA Umroi haka jingkem ding ka kali

Syllad | The Rising MeghalayaOctober 3, 2021

U Para jong u MLA Umroi, Bah George B Lyngdoh ula khlad hashen haka jingjia kem ding kynsan ka kali Mahindra Bolero jong u ha surok bah NH 6 ha Umsalem, Ri Bhoi District.

Une u para jong u MLA Umroi u dei u Bah Ferdinand Banshanlang Lyngdoh uba long u Assistant Professor ha Community Science College ka Central Agricultural University, Tura.

Kane ka jingjia kem ding kane ka kali kala jia haka por 11 baje mynstep haka sngi Saitjain haka por ba u dang thmu ban wan sha Sor Shillong.

Na kaliang ka Shillong Press Club (SPC) bad ka Meghalaya Editors’ and Publishers’ Association (MEPA) kala phah iaka khubor sngewlem sha U Bah Andrew Lyngdoh Editor Nongsain, U Bah George Lyngdoh, general secretary barim ka MEPA bad mynta u MLA Umroi, Kong AR Lyngdoh (Kmie), Publisher U Nongsaiñ Hima.

Ka SPC bad ka MEPA ki buh ka jingbuh ka jingduwai ha U Blei ba don bor baroh ba un pyntngen ia ka iing ka sem jong ki bad kiba ieit ba thoin hadpeng kane ka jingkahdum u lyoh.