Khlad uwei ba leit rung ka scooty sha khrum Shaktiman ha Jowai

Syllad | The Rising MeghalayaJuly 12, 2024

Uwei u samla u khlad noh na ka jingmynsaw jur hadien ba ka scooty kaba u niah kala leit rung shapoh khrum ka trok Shaktiman ha Thluwania Ladthadlaboh, Jowai.

Kane ka jingjia kala jia haka miet 11 tarik Naitung haka por kumba 9 baje 20 minit eiei.

U nongniah kane trok Shaktiman kaba don ia u number ML 04 7248, ula iathuh ba ka kali jong u kala sniew bad kila ieng ha kane ka jaka. Hadien katto katne por kane ka scooty kaba don u number ML 04 D 2675 kaba niah da u Abraham Sajem 18 snem ka rta kala leit rung shapoh khrum kane ka trok shaktiman na ka bynta ba shadien bad ula mynsaw jur.

Ki pulit ka Jowai Police Station marsien ioh jingtip ia kane ka jingjia kila wan shimti bad la pynkit ia u Abraham sha Dr Norman Tunnel Hospital. La ithuh ba hadien katto katne por naka daw ka jingmynsaw jur ula khlad noh.