Khlem ai jingshakri ka OT bad Laboratory ka Khliehriat Civil Hospital

Syllad | The Rising MeghalayaMarch 30, 2025

Ka Jaintia National Council (JNC), Khliehriat Circle haka 28 tarik Lber kala iakynduh ia u District Medical & Health Officer, East Jaintia Hills District halor ka jingbym treikam ka Operation Theatre bad Clinical Laboratory cum Blood Transfusion Services ha Khliehriat Civil Hospital.

Haka dorkhas ka JNC kala kdew iaka jingdonkam kyrkieh ban pyntreikam noh ïa ka Operation Theatre bad Clinical Laboratory cum Blood Transfusion Services naka bynta ka jingmyntoi jong ki paidbah ha ka district.

Ka JNC kala pynpaw ruh ka jingsngewdiaw namar ka jingbym treikam ka Operation Theatre kaba la wanrah ia ki jingeh bad pynbor ïa ki nongpang ban wad jingsumar ha ki jaka sumar kiba jngai. Kane ka jinglong ka buh jingma kaba khraw, khamtam ha ki khep ba kyrkieh ha kaba donkam ban leh surgery mardor.

Nalor kata, ka JNC kala ong, ka jingbym don ka jaka buh snam haka Khliehriat Civil Hospital ka dei kawei pat ka jingeh kaba khraw. Ka jingbymdon jong kum kine ki jaka bunsien ka pynslem ia ki jingshakri ba kongsan ban wad bniah ia ki jingpang.

Haka jingiakynduh bad u DMHO, ka Jaintia National Council ka la ong ba na ka bynta ka jingmyntoi jong ki paidbah baroh, ngi kyrpad ia ka ophis jong phi ban shim ia ki sienjam ba donkam ban pynthikna ba ka operation theatre bad clinical laboratory cum blood transfusion services kan treikam khlem da pynslem.