Khlem buh por yn sangeh treikam ki nongtrei JHADC, la 7 bnai khlem tulop hapdeng ka Lockdown

Syllad | The Rising MeghalayaApril 29, 2020

Ki nongtrei jong ka Jaiñtia Hills Autonomous Council Staff Association (JHACSA) kila rai ban sangeh treikam khlem buh por namar ba ka Executive Committee kaba ïalam ka kynhun United Democratic Alliance kaba iatreilang ka National People’s Party (NPP), United Democratic Party (UDP) bad ka Bharatiya Janata party (BJP) hapoh ka jingialam u ma Thombor Shiwat, Chief Executive Member (CEM) Jaintia Hills Autonomous District Council (JHADC) kam lah ban ai tulop ïa baroh ki nongtrei ka konsil.

Ki nongtrei ka konsil hadien ba kane ka executive committee kaba ialam u Thombor Shiwat kala bthah ban wan trei ki nongtrei ha kane ka lockdown, hynne ka sngi Balang kynsan kynsan kila ïalum paidbah ha khmat ka phyllaw jong ka JHADC ban iakhih paidbah.

Ki nongtrei jong ka konsil kila rai ba kin sangeh treikam khlem buh por tad haduh ba kila ioh tulop.

“Ngi ruh ngi thngan bad ngi donkam ka jingbam bam, hynrei kane ka Executive Committee kam don jingkitkhlieh eiei ban pyrkhat iaka eh ka shon jong ngi ban pyndap pynbiang ïaka jingdonkam jong ha ki ïing ki sem hadpeng kane ka saw ka sain jong ka ri kaba la khang khyrdep ban iakhun iaka khlam COVID-19,” la ong ki nongialam ka JHACSA.

“Ym don ba iarap ia ngi ban pynioh ne ai jing bam ïa ngi watla ngi kyrduh bam, namar ba hakhmat ka sorkar ngi dei ki shakri sorkar bad ym don kiba ai jingiarap ia ngi,” ong ki nongialam ka JHACSA.

Dei halor kane ki nongtrei ka konsil da kawei ka sur kila rai ban sangeh treikam khlem buh por tad haduh baka konsil kan lah ban pynioh tulop ia baroh ki nongtrei naduh u bnai Risaw 2019.

Halor kane ka jingiakhih kynsan ki nongtrei ka konsil, u syllad.com ula pyrshang ban phone ïa u CEM ka konsil, hynrei ka phone jong u ka switch off ne khlem pynmeh.

Ka khubor kaba iohlum ba hadien ba la pynjari iaka lockdown, la bthah iaki nongtrei ka konsil ban wan trei kumba 30 percent, kata ban wan trei katto katne ngut kumba arsien lai sien shitaiew.

Hynrei ki nongtrei ka konsil kila khie bitar ia kane ka rai hapdeng ka lockdown namar ba ki paidbah ruh ym don ba wan sha ka ophis JHADC ba kam dei than ka ophis kaba donkam kum kiwei kiwei ki ophis namar ba kiba bun hi ki kam kane ka ophis ka dei bad ki kot ki sla jong u paidbah.

Ki nongtrei ka JHADC haba la bthah ïaki ban wan trei, mynta ka sngi kila lum paidbah ban iathir jingmut iaka jingeh kaba ki iakynduh.

Ka bor shynshar district haba la ioh jingtip ïa kane hapoh ka jingialam u Superintendent of Police Bah Lakador Syiem bad u Deputy Superindent of Police Bah MJ Marngar kila hiar ban kyntu ïaki nongtrei ka konsil ban nym ialum paidbah bad ban bud ryntih ïaki jingbthah jong ka sorkar bad ka tnad ka koit ka khiah kaba mana ban lum paidbah ban iada n aka jingpur ka khlam COVID-19.

Ki Nongtrei ka konsil ruh da kaba burom ïaka jingkyrpad u SP kila ia pra na District Konsil.

Ha kane ka juh ka sngi la pynthymmai ruh iaki nongialam ka JHACSA bad la jied President ia u ma Johnson Pohrmen, Vice President u Norman Roy Blah, General Secretary u Johnwin Lyngdoh, Assistant Secretary u Sanju Tariang nalor ki nongai buit, bad kiwei kiwei ki dkhot.