Khlem ioh leit iashim bynta I Kong Kmoin Wahlang bad Wandashisha sha ka iakop mareh ha Australia

Syllad | The Rising MeghalayaNovember 8, 2024

Lehse ka long ka khubor kaba sngewsih ban ioh jingtip ba I kong Kmoin Wahlang bad Kong Wandashisha Dewkhaid kim shym la ioh lad satia ba kin leit iashim bynta sha ka jingiakob mareh thong ba la tip kum ka “13th Pan Pacific Masters Games 2024,” kaba dei ban long ha sorbah Gold Coast, Australia.

Ha ka jingshisha kane ka jingiakob mareh ka la dei ban long ha ka 10 tarik mynta u bnai ha Queensland, Australia.Ki khubor ki iathuh ba ka jingbym ioh leit iashim bynta jong kine ki arngut ki nongiamareh thong ka Jylla ka dei hadien ba kim lah satia ban ioh satia ia ka visa.

Nalor kata la bynrap ba kane ka jingduh leit iashim bynta kam dei tang ia kine ki arngut ki nongia mareh thong hynrei wat ia u nongialam jong ki ruh u Bah Benningstar Lyngkhoi.

Ha ka jingshisha na ka liang ka sorkar jylla lyngba ka Tnad Sports & Youth Affairs ka la wan shakhmat ba kan iarap ha ka ban kyrshan lem ia kine ki arngut ki nongiamareh thong ba bna nam ka Jylla ban ioh ban leit ban iakhun sha kane ka jingiakob kaba heh bad kumjuh na kiba bun ki paidbah kiba la ai ka jingkyrshan kaba pura na ka bynta jong ki.

Haba iakren bad u District Sports Officer ka South West Khasi Hills District u Bah Damang Syngkon u pyntip ba kane ka jingduh leit ialehkai jong kane ka kynhun ka dei hadien ba ka Tnad treikam bar ri jong ka Australia ka la shem ba ki don ki jingduna ha kaba iadei bad ki kot ki sla, nangta ha ka por ba shim interview ruh lehse kim da nang bha ba kin ai ia ka jubab.

U Bah Damang u kynnoh ruh ia ki Synjuk ialehkai ne ki Federation ba kim shym la ai ia ka por kaba biang, namar lada dei  ba la tip lypa ruh la ioh ban buh biang ia ka jingkyrpad ne ban lah ban  thoh wat na ka liang ka Sorkar ba ia  kine ki nongiashim bynta la ithuh bad ba la kyrshan ruh da ka sorkar.

Kane ka jingduh kam dei satia tang na ka bynta i Kong Kmoin lane ia kong Wandashisha pynban la ioh jingtip ba napdeng ki 40 ngut, bun bah kiba la duh ban leit ban iakhun sha katei ka rynsan iakob sha Australia.