Khlem ka jingtip ka bor shnong Wapungskur, ioh jingbit ban pynieng karkhana sain rnga dewiong

Syllad | The Rising MeghalayaApril 2, 2025

Wat hadien ba ka East Jaintia Hills District kala iakhih paidbah halor ka jingjyllei ki karkhana Coke ne ki karkhana sain rnga dewiong, pynban kawei ka karkhana sain rnga dewiong kala ioh jingbit ne No Objection Certificate (NOC) na ka Meghalaya State Pollution Control Board (MSPCB) ban pynieng iaka karkhana ha Wapungskur.

Kane ka la paw pyrthei haka 2 tarik Iaiong hadien ba ka bor shnong Wapungskur bad ki dkhot shnong haka jingialam u Waheh Shnong ma Postling Dkhar kila hiar jurip ia kane jaka bad kila lap ba ka dei ka jingshisha.

Katkum ka jingbit ne NOC- kaba la tip kum ka Consent to Establish kaba la ai sha kawei ka company – ka Om Om Coke ban pynmih ia u rnga dewiong – LAM Coke Manufacturing Unit haduh 24 hajar metric tonne shi snem kaba shongdor T.4 klur 50 lak.

Na kaliang u Waheh Shnong Wapungskur, Ma Postling Dkhar ula iathuh ba ia ka NOC la ai da ka dorbar shnong Mookhep bad ka kyrteng ka jaka ka dei Thlukure Wahtongtiang kaba hap hapoh u pud u ang ka Wapungskur.

Ula ong ba u Waheh Shnong Mookhep u tip bha ba kane ka jaka ka hap hapoh u pud u ang ka Wapungskur kumjuh u Dolloi. Ula buh jingkylli kumno ki ai iaka NOC khlem ka jingpynsngew paidbah wat la ka jaka ka long kaba jan bha bad ki nongshong shnong.

Ula pynpaw ka jingpyrshah kaba jur ia u Dolloi; bad u tip bha ba ka Wapungskur bad Mookhep ki don marjan, hynrei ia kane ka kam la shu leh khlem ka jingtip ka shnong.

Na kaliang ka bor shnong kala dawa ban pyndam mardor ia kane ka NOC bad ban kynriah shisyndon ia na kane ka jaka.