Khlem khot pynlong u MP ka Shillong ia ki DISHA meeting ha Ri Bhoi bad EKH

Syllad | The Rising MeghalayaFebruary 26, 2024

U Myntri ka Tnat C&RD u AT Mondal haka 26 tarik Rymphang, u la pyntip hapoh ka iingdorbar thaw ain ba u MP ka Congress na Shillong u Bah Vincent H Pala um pat shym la khot pynlong satia ia ki DISHA meeting hapoh East Khasi Hills bad Ri Bhoi District ha kine ki shi snem ba la dep.

Na ka liang u nongmihkhmat liang pyrshah ka VPP na Mawryngkneng u Bah Heaving Stone Kharpran bad u nongmihkhmat ka UDP na Nongpoh, u Bah Mayralborn Syiem ki la buh ka jingkyrpad ia ka sorkar ba kan kyntu ia u MP ka Shillong ba u dei ban khot pynlong ia ki DISHA meeting hapoh kine ki artylli ki district.

U Mondal u la ong, “Ngan sa pyntip sha u MP na ka bynta ban khot pynlong ia ki DISHA meeting.U la ong ba ka jingkhot pynlong ia kine ki DISHA meeting ka dei ka bynta jong u MP na ka bynta ban bishar bniah ha kaba iadei bad ka jingpyntreikam ia baroh ki prokram jong ka sorkar pdeng bad ruh ban khmih halor ki jingeh kiba kum ki nongioh jingmyntoi ki iakynduh.

Katba na ka liang u Myntri Rangbah ka jylla u Conrad K Sangma u la ong ba ki DISHA kim dei satia ki prokram jong ka sorkar jylla.

“Kam dei satia ka jingkitkhlieh jong ka jylla na ka bynta ban pynlong ia kine ki meeting.Ka sorkar pdeng hi ka la jurip ia ki skhim ki jong ka lyngba ki MP, bad na ka liang ki MP ka constituency jong u ne ka ki dei ban khot pynlong ia ki jingialang namar kine ki long beit beit hapdeng ki tnat treikam bad u MP,” ong shuh shuh u CM.