Khlem seisoh ka jingialang ka MCTA bad u VC ka NEHU, yn bteng ia ka jingpyrshah

Syllad | The Rising MeghalayaSeptember 11, 2023

Ka Meghalaya College Teachers’ Association (MCTA) haka sngi Nyngkong ka la shim ia ka rai ban ym weng ia ka jingpyrshah hadien ba u Vice Chancellor (VC) ka North Eastern Hills University u Prof Prabha Shankar Shukla u la kyntait ban pynkylla ia ka ‘notification’ ne ka jingpynbna ba la pynmih ha ka 12 tarik u Naitung ba la dep kaba la hukum ia baroh ki kolej kiba la pyniasoh ba ki dei ban pyntreikam ia ka National Education Policy (NEP) 2020.

Ia kane ka rai la shim hadien ka jingialang kaba la neh lai kynta ia kaba la khot pynlong da u Prof Shukla bad ka kynhun ka MCTA hapoh NEHU.

Haba kren sha ki lad pathai khubor, u general secretary ka MCTA u Bah Airpeace W Rani u la ong ba ka kynhun ka la pynkynmaw ia u VC halor ka shithi ka MCTA kaba ha ka 21 tarik u Naitung ba la dep, kata ha kaba la kyrpad ia u ba un weng noh ia katei ka jingpynbna jong ka 12 tarik u Naitung.Hynrei, na ka liang u VC u la kyntait ban weng hynrei u la shu mynjur tang na ka bynta ban wanrah ia ka Academic Council ka ban wan na ka bynta ki jingpynbeit.

“Lada phim weng noh ia kane ka jingpynbna, kumno phin mutdur ia ngi ba ngin weng noh ia kane ka jingpyrshah ka jong ngi.” U Bah Rani u la ong ruh ba ka dei ka kam thok kam shukor kaba pyllein pyllein hadien ba katei ka jingpynbna ka la kam ba yn pyntreikam ia ka NEP lyngba ka jingshim rai da ka 110th Academic Council.

Nalor kata u Bah Rani u la ong ruh ba na ka liang u VC u la pdiang ruh ba ka la don ka jingbakla ha kaba iadei bad katei ka jingpynbna. “Haba ngi kylli la kin weng ne em ia kane ka jingpyhnbna, u VC u la jubab ba kin ym weng satia namar kiba bun na ki college ki la iaid shakhmat ban pyntreikam da ki course kiba thymmai hapoh jong ka NEP bad ba haduh mynta ym pat don iwei ruh ki principal ki ban wan shakhmat ban pynpaw ba kim lah ban pyntreikam ia ki degree course kiba thymmai,” ong u nongialam ka MCTA.

“Kumta ruh ngi la pynpaw ba namar ia katei ka jingpynbna ym pat shym la ai jingmynjur da ka academic council, kumta ka long kaba beain bad ngi kwah ia u VC ba un weng noh bad lada um lah ban leh kumta, ngin ym lah ban weng ia kane ka jingieng pyrshah namar ngim lah ban ia mynjur bad kiei kiei ki bym long katkum ka ain,” ong shuh shuh u Bah Rani.

Ha ka juh ka por u la ong ba na ka liang u VC ruh u la pdiang ba ki la don ki jingeh ha ka liang ka jingpule lyngba ka jingpyntreikam ia ka NEP, hynrei u la ong ba ia kine baroh yn sa lah ban weng noh hapoh ki khyndiat sngi.