Khlem shimbynta kiba bun ki nongtrei, ki MDC liang pyrshah haka jingplie iaka building thymmai ka JHADC

Syllad | The Rising MeghalayaDecember 5, 2023

Kan long ka sngi kaba sah kynmaw haka history jong ka Jaintia Hills Autonomous District Council (JHADC), wat la niew iaka kum ka ophis kaba bun nongtrei, hynrei kim shym la shim bynta haka jingplie paidbah iaka ophis treikam ba thymmai jong ka konsil haka 5 tarik Nohprah.

Kane ka ophis treikam kaba thymmai ka dei kaba la tei iaka lyngba ka grant na ka sorkar pdeng kaba la tip kum ka Grant to Excluded Areas ne ka jaka bym shym la kynthup haka Riti Synshar jong ka ri hapoh ka Part IX bad IX A. Kane ka grant ka dei jong u snem 2018-19, 2019-20 bad 2020-21 kaba la kynjoh haduh T.3 klur 38 lak.

Nalor ki nongtrei ka JHADC, lait noh ki ophisar, ki MDC ka liang pyrshah ruh kim shym la shimbynta haka jingplie ia kane ka ophis thymmai.

Kular ka sokar ban pyllait iaka bhah JHADC, weng jingiakhih ki nongtrei

Kane ka jingbym shim bynta ki nongtrei ka konsil, ka lah wan jia long namar ka jingbym lah ka Executive Committee kaba ialam ka NPP bad UDP ban pyllait iaka tulop kaba sah kumba 8 bnai.

Dangshen ki nongtrei ka JHADC hapoh ka JHADC Staff Association kila weng iaka jingiakhih shong kyllain myngngor, kata haka 20 tarik Naiwieng hadien ka jingiakren bad ka Secretary ka JHADC kaba la pyntip ba ka sorkar kala kular ban shimkhia ban pyllait iaka bhah khajna ba dangsah jong ka konsil ha kaba kut jong une u bnai Naiwieng (November) ba kin pynioh tulop.

Phewse kane ka EC kaba ialam u Thombor Shiwat kum u Chief Executive Member (CEM), kaba sorkar Jylla ruh ka dei kaba ialam da ka NPP bad UDP kam shym la lah ban pynurlong iaka jingdawa ki nongtrei, khamtam ha kum kane ka por kaba dei ka aiom lehkmen Christmas, Snem Thymmai bad khamtam ka jingdawa ban siew iaka bai skul khun.

Thaw ka JHADC iaka Delimitation Committee ban pynbeit iaki constituency

U m Thombor haba kren haka jingplie ia kane ka ophis thymmai ka konsil, ula pynpaw iaka jingsngewkhia halor ka jingiakhih khah khah da ki nongtrei jong ka JHADC halor ka jingbym ioh tulop, bad u suba ioh ba ka dei ka jingleh politic da mano re mano lyngba jong ki na bynta ka jingmyntoi jong no re jong no.

Hynrei na kaliang u CEM ula kyntu iaki ophisar bad nongialam jong ka JHADC Staff Association ba kin nym ialam bakla namar ba ka EC ka khlem shong kli kti haba iakhun iaka jingioh tulop ka jong ki.

Shuh shuh ha kaba iadei bad ka jingkynthoh jong kiba bun, ba balei donkam ban tei building thymmai haka jaka ban siew shwa iaka tulop ba dangsah jong ki nongtrei ka JHADC, u Ma Thombor ula pynshai ka jingtei iaka building hap ban bud thik pa thik iaki kyndon ne guidelines, ka bym lah ban transfer ne siew sha ka tulop. Kane ka grant ka dei kaba leh isynei da ka sorkar pdeng iaki konsil kiba hap haka excluded area lane kim bym shym la kynthup haka Part IX & IX A jong ka Riti Synshar ka Ri.

Ula pynkynmaw ruh iaka jingshim kylliang iaka pisa na ka SAG na ka bynta ban siew tulop iaki nongtrei jong ka JHADC, hynrei ula shah ai mukotduma pynban ha u Ma Lakhon Biam da kaba kynnoh ba u CEM ka JHADC u pyndonkam bakla iaka Fund SAG ban siew tulop, hynrei ka jingshisha hi ka dei ka jingshim kylliang na ka bynta ban siew iaka tulop nongtrei.

“Ka por ka dang biang, to ngin ia weng iaka jingbym iasngewthuh jingmut, ka jingrah lama iong, ka jingiakhih kam long kaba donkam namar kaba dei hi ban ioh lada ym pynlong da ki jingiakhih ruh ngin ioh beit”, la ong u Ma Thombor bad kyntu jur iaki nongialam bad nongtrei ka JHADC ban iatreilang na ka bynta ka bha ka miat jong ka konsil.