Khlem shongthait ki pulit ban thwet ia kiba donkti ha ki jingjia kawang petrol bom ha Shillong: SP

Syllad | The Rising MeghalayaMay 3, 2024

U Superintendent of Police ka East Khasi Hills u Rituraj Ravi u la ong ba ki pulit ki la trei khlem shongthait ban pynthikna ba baroh ki runar kiba donkti halor ki jingjia kawang petrol bom kiba la jia ha ka nongbah Shillong kin ym lait suk na ki kti jong ka ain.

Haba kren sha ki lad pathai khubor haka 2 atrik Jymmang, u Ravi u la ong, “Ngi la trei khlem shongthait bad ngin pynthikna ba baroh kito ki runar kiba donkti kin ngat ha ka jingshah tian bishar bad khnang ban lah ban pynneh ia ka shongsuk shongsain. Ngi la kut jingmut skhem bad ngi pynthikna ruh ba kiba kum kine ki jingpyrshang da ki riew runar ne ki samla kiba shah ialam bakla kin ym seisoh satia.”

U SP u la ong ruh ba la ujor da ki ejahar ha kaba iadei bad kine ki jingjia bad ka jingtohkit ka la iaid shakhmat. U la ong ruh ba haduh mynta kim pat shym la ioh ban kem iano iano ruh.

“Watla katta ha baroh kine ki jingjia shah thombor kam shym la don satia kano kano ka jingmynsaw lane ka jingjulor. Ha kiba bun na kine ki jingjia ki petrol bom ba la kawang kim shym la bthei, kim shym la don ki jingjulor ia ki jingdon jingem lane kino kino ki jingmynsaw. Hynrei watla katta ha baroh kine ki jingjia, ngi la rejistar case bad ka jingtohkit ka la iaid shakhmat ban lapdien ia ki runar kiba donkti,” ong u heh pulit.

Nalor kata u Ravi u la ong ruh ba ka la don ruh ka jingkawang da ki katto katne tylli ki iit ba la pait sha ki bynta rud surok hajan ka jaka shong jong ki bor pahara CRPF ha Mawlai ha ka miet jong ka 1 tarik mynta u bnai. “Ngim pat shym la ioh ka jingujor ba thikna halor kane ka jingjia hynrei ngi la pynlong ka jingtohkit halor kane, u la ong shuh shuh.

Shuh shuh u SP u la ong ruh ba ka dang kloi palat ban pyniasoh ia kine ki jingjia kawang petrol bom bad kino kino, kata haba jubab ia ka jingkylli la kine ki jingjia ki don jingiadei ne em bad ki jingshah kem ba dang shen jong ki dkhot sengbhalang.

Ingkhong ka kali jong ka tnat Water Resources na ka jingshah kawang petrol bom ha Shillong