Khlem treikam ka RDA; Ha la ka jong yn mih iakhun ka UDP bad HSPDP ha ka elekshon MDC

Syllad | The Rising MeghalayaDecember 12, 2024

Ka Regional Democratic Alliance (RDA) jong ka United Democratic Party (UDP) bad ka Hill State People’s Democratic Party (HSPDP) kam shym la treikam satia ha kane ka kynti kaba mynta hadien ba baroh ki artylli ki party ki la rai ban iaid ha la ka jong ka lynti ha kane ka elekshon MDC ka ban wan ha Rilum Khasi bad Jaintia.

Kane ka rai ka la mih na ka jingialang jong ka RDA kaba la long ha ka 11 tarik Nohprah ha ka ophis treikam ka UDP ha ka jingpyniaid da u President ka UDP u Bah Metbah Lyngdoh ha ka jingiadon lang u President ka HSPDP Bah KP Pangniang bad ki nongialam jong kine ki ar kynhun.

Haba kren sha ki lad pathai khubor hadien ka jingialang u president ka UDP u Bah Metbah Lyngdoh u la ong ba kane ka elekshon MDC sha ka KHADC bad JHADC la rai ba ka UDP kan iaid ha la ka jong ka lynti kumjuh ka HSPDP. Hynrei u la ong ba kane ka mut satia ba ka RDA kan ym iatreilang ha kino kino ki mat kiba ktah ia ka Ri bad ka Jaidbynriew.

U la ong ruh ba kine ki ar party hapoh ka RDA kin dang iai bteng ia ka jingiatreilang namar la thaw ia ka RDA ym tang na ka bynta ban iakhun ia ki elekshon hynrei ruh halor kiwei pat ki mat kum ka Inner Line Permit (ILP), ka jingpynrung ia ka ktien Khasi bad Garo ha ka khyrnit ba phra jong ka Riti synshar Ri, ka jingpynbeit pud bad kiwei pat.

Shu shuh U bah Metbah u la ong ba ka jingpynieng la ki jong ki Kyrtong kam mut satia ba ka RDA ka iapait iapra hynrei da ka jingiasngewthuh jingmut na baroh artylli ki ar party.