Khlem wan ki 7 ngut ki MLA Jaiñtia haka jingïalang ka JARF ban ïakren halor ka kam tih dewiong

Syllad | The Rising MeghalayaFebruary 14, 2020

Dawa ka JARF naka Sorkar Jylla ban khot ïakren ïaki lai tylli ki autonomous district councils (ADC) jong ka jylla khnang ban ujor da ka Review Petition ha Supreme Court pyrshah ïa ka rai jong ka.

JOWAI: Ka jingialang kaba la khot da ka Jaintia Amalgamated Redressal Forum (JARF) ïaki 7 ngut ki MLA jong ka Rilum Jaiñtia kala pulom noh namar ba wat tang uwei u MLA ruh um shym la wan satia ha katei ka jingïalang kaba la thmu ban pynlong ha Orchid Inn, Mukhla Thadlaskeiñ, West Jaiñtia Hills District haka sngi Thohdieng.

Ka JARF kala khot ïa kane ka jingïalang kadei na ka bynta ban ïakren halor ka hukum jong ka Supreme Court kaba pyllait ïa ka jingtih dewiong ryngkat bad ki kyndon kiba khum teh ïaka rukom tih dewiong. .

Ki nongïalam ka JARF kila ap shi kynta tam ïaki MLA ha katei ka jaka, hynrei namar ba kim shym la wanpoi satia, ka JARF kala ïaid shakhmat ban ïakren ïa kane rai jong ka ïing bishar ba hakhliehduh ka ri.

Hadien ka jingïathir sani bha ha kane ka jingïalang ka JARF kala da kawei sur kala dawa naka Sorkar Jylla ba ka dei ban lum jingïalang jong baroh lai tylli ki autonomous district councils (ADC) jong ka jylla khnang ban ujor da ka Review Petition ha Supreme Court pyrshah ïa ka rai jong ka Supreme Court kaba pyllait ïa ka jingtih dewiong bad ban pynjynsur ïaki kyndon ba the ba khum ïak kam tih dewiong.

Ka JARF ka la mut ban pynpaw ïa kane ka jingdawa ha ki hynniew MLA jong ka Rilum Jaiñtia haka ka jingïalang kaba la pynbeit ha Orchid Inn Mukhla Thadlaskein haka sngi Thohdieng. Hynrei tang uwei u MLA ruh u khlem poi satia sha katei ka jingïalang wat hadien ba ki nongïalam jong katei ka seng ki la ap haduh shi kynta tam ha katei ka jaka.

U Secretary jong ka JARF u Ma Leningstar Rymbai, uba long ruh u President jong ka Jaiñtia Student’s Movement (JSM) u la ong ba ka don ka lad ka lynti ban pyllait ïa ka jylla na ka jingteh jingkhum jong ki aiñ jong ka Sorkar India ha kaba ïadei bad ki kam tih marpoh khyndew bad kata ka lad ka lynti ka long ban ujor Review Petition pyrshah ïa ka hukum jong ka Court bala pynmih ha ka 3/7/2019.

Haba phai sha ka hukum jong ka Supreme Court, u la ong ka Court ka la hukum ïa u dewiong ba dang sah uba kot haduh 32 lakh 56 hajar 715 metric tons na ki saw tylli ki districts jong ka jylla— kata ka East Jaiñtia Hills District, ka West Khasi Hills District, ka South West Khasi Hills District bad ka South Garo Hills District dei ban lilam noh na ka Coal India Limited.

U Leningstar Rymbai u la ong ka hukum jong ka Supreme ka kren shai ba ka Coal India Limited kan rai ka jaka haei ban shimti ïa utei u dewiong, ka bai kit bai bah ne ka transportation yn siew da ka Sorkar Meghalaya ne ka Coal India Limited ne baroh ar bad ïa katei ka bai kit ne shalan yn sa ot na ka dor bala dep lilam ïa u dewiong. Nalor kata ka Sorkar Jylla kan ot ka bai khajna dewiong, ka bai Meghalaya Environmental Regeneration Fund (MERF) lem bad 10 percent sha Coal India Limited na ka pisa kaba la mih na ka jingdie ne lilam ia dewiong.

U Leningstar Rymbai u la buh jingkylli, “Balei haduh mynta pat ym pat sdang satia ïa ka kam lilam dewiong da ka Coal India Limited?” U la kylli shuh shuh ka Sorkar Jylla ka leh aiu halor kane ka hukum jong ka Supreme Court? Hato ki trai dewiong kin tip ne em ïa ka dor ba lilam ïa u dewiong, katno bai kali ne transportation katno ka bai khajna katno kata ka 10 percent sha ka Coal India Limited?

“Haba kren lyngkot kan don ne em ka transparency bad accountability namar ka jingot ka long kaba la bun shwa ba kan poi sha u trai dewiong,” u la bynrap.

U la kylli ruh balei ka Sorkar Jylla kam ïakhun tyngeh ban pynkylla noh ïa ka Para 12 A (b) jong ka Sixth Schedule jong ka Constitution ka Ri India kaba mynta ka long “U President jong ka Ri India” sha u “Governor ka Jylla Meghalaya” un don bor ban khanglad ïa ka jingpyntreikam ïa kano kano ka aiñ jong ka Sorkar Kmie ha ka Jylla Meghalaya.

U la ïathuh ba kane ka long kaba donkam namar ka Supreme Court ha katei ka hukum jong ka ka long kdew ba kam don kano kano jingteh jingkhum hapoh Sixth Schedule kaba khanglad ban pyntreikam ia ka ain ka Mine and Mineral Rule Regulation Act 1957.

U Nongialam jong ka JARF ula kynthoh tyngeh ïaka Sorkar Jylla halor ka jingbym lah jong ka ban shna ïa ka mining policy ka mining plan naduh u snem 2014.  “Ka hukum jong ka Supreme Court, katkum ka jingsngewthuh jong ngi ka la ban jur ia ka jingdonkam jong ka mining policy bad mining plan shwa ban ioh tih dewiong biang sa shisien,” ula bynrap u Leninstar.

Haka juh ka por u Chairman jong ka JARF U Ma Helping Phawa u la ïathuh ba ki nongialam jong ka JARF ki sa leit shim bynta ha ka Orientation Programme bala khot pynlong da ka tnat Directorate of Mineral Resources jong ka Sorkar Jylla ha ka 17 tarik mynta u bnai ha Community Hall, Khliehriat West.

U la ong ba kin sngap kaei ba kiei ki saintis kin batai halor ka mining plan bad ki lad tih dewiong katkum ka jingstad saian bad lada ka jingbatai jong ki kam long katkum ka United Khasi Jaintia Hills District (Application of Law) Regulation 1952 na ka liang ka Forum kin nym pdiang satia.

Ka Directorate of Mineral Resources, Government of Meghalaya kala khot ïa kane ka jingpynsgewthuh paidbah ïaki trai par dewiong ha kaba ïadei bad ka hukum jong ka Supreme Court khnang baka jingtih dewiong kan long kaba ïadei bad ka mariang ban ïoh ïaka license, ban pynbiang ïaka geological report, mining lease kaba dei katkum ka Scientific Coal Mining Plan jong ka Mines and Minerals (Development and Regulation) Act 1957 bad ka Mineral Concession Rules, 1960.