Khluit shipor ka iing dorbar haba ia tai ia ka kam pynbeit pud kyntait u CM ban phaidien biang ia ka MOU

Syllad | The Rising MeghalayaSeptember 14, 2022

Ka dorbar synrai jong ka iing dorbar thaw ain ka jylla, haka sngi Balang kaba dei ka sngi kaba saw ka jingshong dorbar, shiphang ka la poi sha ka jingiakhuit, katba ki dkhot ha ka iing ki dang ia thir bad tai sani bha halor ka kam ia pynbeit ia u pud u sam bad ka jylla Assam bad ka jingsoi ruh ia ka soskular ne ka Memorandum of Understanding (MoU).

Dei ha kum kane ka khep ba dang ia tai, kaba la pynlong ia u shnongknor ka iing dorbar u bah Metbah Lyngdoh ba um banse ban hap ban maham da kaba tyngeh pyrshah ia u MLA ka North Shillong u bah Adelbert Nongrum, ba um, bit ba u kdew ne kynnoh ba khlem shim la ailad lem ia u ban iashim bynta ha ka jingkylli bynrap haba iadei bad kane ka kam, kampher wat hadien ba u la rah bunsien ia la ka jong ka kti kum ka dak ban pynpaw sha u shnongknor, ba u ruh u kwah ban iashim bynta lem.

Ynda haba u shnongknor ula ailad ia u bah Adelbert ban iashim bynta, hangne tar khluit ka iing dorbar, ha kaba u la ong ia u Myntri Rangbah u Conrad K Sangma la u nud shisha ne em ban ia khmih bniah biang sa shisien ia ka MoU kaba la dep ban ia soi, da kaba u la ai da ka nuksa ba lada ia ka riti synshar la lah ban pynkylla haka dur ki amendment balei bym lah ban pynkylla ia kane ka MoU, kaba kren shai kdar ba imat don eiei sha lyndet.

Haba ieng ban jubab, hangne na ka liang u Myntri Rangbah Conrad K Sangma, u kylli kylla ia u bah Adelbert ba u lah ne em ban jer kyrteng ia kita baroh 12 tylli ki jaka bad kylli syndon ia u ba katno sien u la poi sha kine ki jaka….. pan jubab kylla u Conrad.

Hangne ka drama ka la nang kham khluit ha kaba u bah Adelbert u la sdang ban kham kren kham jam, da kaba ong artad ba ka dei ka kamram jong u Myntri Rangbah ban batai ha ka iing ia kita ki 12 tylli ki jaka, da kaba kynnoh ba ka sorkar ka la phiel da kaba kam shym la kynthup lang ia baroh  ban ia don bynta ha kane ka kam.

Halor kane ka jingkynnoh u bah Adelbert, joit la ieng ruh sa u Symbud Myntri Rangbah ba dei khmih ruh ia ka in-charge Parliamentary Affairs u bah Prestone Tynsong, ha kaba u la ong ba sngewbha ym dei ban ia ak drama ne wat  pynmih ia katta ka mynsiem pynmynlung (emotional).

Hadien kane u Myntri Rangbah u Conrad K Sangma, u la iai bteng ban ai ia ka jubab kaba shai hapoh ka iing, da kaba u la ong ba lada u dkhot ka iing u sngew khia shisha ia kano kano ka shnong, u lah ban iathuh sha ka sorkar kaba long kaba kloi ban iakren bad ia pynbeit, hynrei ban shu hylla ne ban sdang ban ak drama tang namar ban jop election kane kan nym poi shano shano ruh.

Haba jubab halor ka jingkylli u MLA ka Nongpoh bah Mayralborn Syiem, u Conrad K Sangma u la ong baka long kaba eh ban lah ban ia phai dien biang sha ka MoU kaba la dep ban ia soi, da kaba u la ong pat ba ka lad ka plie ban ia shong ban iakren bad ia phylliew jingmut ne ban iakren bad ki paidbah, hynrei ban phaidien trai biang ia ka MoU da leilei kan nym lah ban long bad lada ki dkhot ka iing ki sngew khia ia kano ma kano ka shnong, ka jingiakren ka lah ba kan urlong tang hapoh ki kyndon jong ka MoU.