Khot hajir ka MHRC ia u SP ba pyrshang kit jubor ia ka Kong Bindas sha Hospital

Syllad | The Rising MeghalayaJune 11, 2024

Ka Meghalaya Human Rights Commission (MHRC) ka la khot hajir ia u Superintendent of Police (SP) ka East Khasi Hills u Rituraj Ravi ha ka 20 tarik mynta u bnai halor ka jingpyrshang ban kit jubor ia ka longkmie kaba pynlong jingiakhih shah thngan shapoh hospital.

Ka MHRC ha u kyrwoh lyngba u Secretary ka la pan ruh ia ka kaiphot kaba bniah na ka Director General of Police (DGP) ha kaba iadei bad katei ka jingjia kaba la jia ha ka 9 tarik mynta u bnai.

Ha katei ka sngi u SP ka East Khasi Hills u la leit sha katei ka jaka kaba ka Kong Bindas Syiem ka la pynlong ia ka jingiakhih ba jai jai da kaba shong shah thngan hapoh additional secretariat parking lot hadien ba u la pyrshang ban kit jubor ia ka shapoh hospital. 

Ha kaba kum kane ka por ka la mih ka jingiania kaba jur bad ki briew kiba don ha kane ka jaka kiba la wan khnang ban aijingkyrshan ia kane ka longkmie kaba dei na ka shnong Umden, Ri Bhoi District.

Kane ka jingiakhih shah thngan jong ka Kong Bindas Syiem ka long ban pynpaw pyrshah halor ka jingpynslem ban pynbha ia ka surok kaba la jot la pra na Nongpoh-Umden sha Sonapur.