Khot ia baroh ki MDC shuwa ban thaw iaka committee bad ki MLA Jaintia ong ki MDC BJP ia u CEM JHADC

Syllad | The Rising MeghalayaJune 21, 2020

Ki lai ngut ki MDC jong ka Jaintia Hills Autonomous District Council kiba kynthup ia u Ma Lakhon Biam, ma Krison Langstang bad u ma Dawan Lyngdoh ki la kyntu ia u CEM jong ka JHADC Ma Thombor Shiwat ba un khot shwa da ka jingialang baroh ki MDC jong ka JHADC Jowai (all MDC meeting) ha shwa ba un khot ia ka coordination committee bad ki MLA na Jaintia Hills.

“Ngim pyrshah ia kane committee bad ngi ruh ngi pdiang tangba ngi kyntu ban sdang shwa bad kiba na iing ym dei ban khot shwa nabar kum ba phi leh ia u Tonu Dey (Guarav) namar naduh ba ngi la shah jied kum ki nongmihkhmat MDC sha ka District Council la shi snem lai bnai mynta u CEM T. Shiwat ym shem la khot lang ia ki MDC ban ia kren ia kine ki jingeh ka council wat tang shi sien ruh kane ka long kaei kaei kaba pynlyngngoh ia ngi kum ki para MDC,” ong u kyrwoh bala phah kine ki lai ngut ki MDC BJP.

Kine ki lai ngut ki MDC kila pynpaw ka jinglyngngoh ba ki iohi sha ki kot khubor u CEM u la pynbna ba un khot lut ia ki MLA Jaintia ban ia ai jingmut lang ia ka council da kaba thaw ia ka coordination committee ha pdeng ki MLA bad ka EC jong u bad kane ka kdew shai ba une u CEM um donkam ia kiwei ki MDC ki bym don hapoh ka Executive Committee (EC) jong u bad um ju pdiang hi ruh ia ka jingmut ba ki ai na kane ka daw ba um lah ban pyndon kam ia ka jingmut ki MDC ki bym dei ki EM u la hap ban khot noh syndon da ki MLA.

Halor kane ki MDC BJP ki kyntu ia u CEM ba un khot ia ki MDC baroh ban ia ai jingmut lang kumno ban pynim ia ka council bad lada kim lah ban ai jingmut hadien kane sa khot pat kat kiba u ibit, hynrei ia mynta ki kyntu ia u CEM ba u dei ban khot shwa ia ki MDC baroh ban ia ai jingmut para MDC.

Baroh u nongshong shnong u tip ba ka Jaintia Hills Autonomous District Council (JHADC) ka dei kawei na ki lai tylli ki Autonomous Council kiba don hapoh ka state Meghalaya ia kiba la thaw kyrpang hapoh ka Sixth Schedule naduh u snem 1946 katkum ka riti synshar ka ri India na ka bynta ban iada ia ka riti ka dustur, ka khyndew ka shyiap bad kiwei kiwei de ki jingeh kiba iadei bad ka jaitbynriew rit paid jong ngi. Hynrei kumba ka long mynta, ka JHADC ka don ha ka jingma kaba khraw namar baka la sdang ban duh noh ia ka jinglong laitluid (Autonomous) ban treikam na kiba bun ki daw, la ong ki MDC BJP.

Kila ong shuh shuh ba ha ka jingiaid lynti jong ki ha kine ki shisnem lai bnai kiba la dep kum ki MDC kiba don ka jingkitkhlieh na ka bynta ka jaitbynriew bad ka Council hi baroh kawei, ki la wad bniah bad ki la shem ba ki don shibun ki daw kiba ialam ia ka Council sha ka jingdkhoh ha ka rukom treikam kiba la longdoh longsnam naduh ki por kiba mynshuwa bad haduh kine ki sngi kiba mynta. Kane ka jingwad bniah naka bynta ban pynbha bad ban pynkiew ia ka rukom treikam ka Council kan iai bteng shuh shuh nangne shakhmat ha ki por ki ban sa wan.

Ha kine ki por kiba khyndiat, ngi la ioh lad ban ia phylliew jingmut bad ki para MDC hapoh ka council ba kumno kum ki nong mih khmat kiba la pynkupbor da ki paitbah, ki dei ban wad ia ki lad ki lynti khnang ban pynneh pynsah ia ka iktiar jong ka Council da kaba pynbha ia ka rukom treikam jong ka council, hynrei kaba ngi sngewsih ka long ba kine ki jingai jingmut ki long lehnohei bad kane ka lah ban wanrah ia ka jingma kaba khraw nangne shakhmat kat haduh u pud baka lah ban duhnoh syndon nangne shakhmat lada kan iai bteng ban treikam kumne.

Ha ka jinglap jong ki MDC BJP, ka Jaintia Hills hi baroh kawei ka long kaba riewspah nadong shadong naduh ki marpohkhyndew, ki jaka jngohkai, ki Kharkhana, kumta ter ter ha kaba lada  ka council ka biang ia ki policy treikam lane ki mat treikam, ka dang don jingkyrmen ban pynkhie im bad ban pynim biang ia kane ka council.

Kine ki lai ngut ki MDC BJP kila kop ruh “Ka party jong ngi, ka Jaitbynriew hakhmat, ba ar ka party bad balai ia lade. Kyrpad ruh ia ki MDC ban klet ia ka party kaba ki don da kaba iatrei ryngkat lada ngi wanrah ia ki policy kiba thymmai, ngin sa lah biang ban wanrah ia ka iktiar bad burom jong ka council na ka bynta ban pyntreikam hok ia ki ain ki rule katkum ka bor ba la ai bor da ka riti synshar jong ka ri lyngba ka Sixth Schedule.”