Khot iakren ka sorkar ia ki Harijan ha ka 7 tarik Nohprah halor ka rai pynkynriah na Them Metor

Syllad | The Rising MeghalayaNovember 30, 2023

U Symbud Myntri Rangbah ka jylla u Bah Sniawbhalang Dhar haka sngi Palei u la ong ba ka sorkar kan pynlong ka jingiakren bad ka Harijan Panchayat Committee (HPC) ha kaba iadei bad ka jingthmu ban pynkynriah noh ia ki napoh Them Metor ha ka 7 tarik u Nohprah 2023.

Haba kren sha ki lad pathai khubor u Bah Dhar uba khmih ruh ia ka Tnat Urban Affairs u la ong ba ka sorkar kan pynlong ia ka jingialang ha ka 7 tarik u Nohprah khnang ban ioh ban iakren sani ha kaba iadei bad kane ka jingthmu pynkynriah ia kito ki longiing Harijan na Them Metor ha kawei pat ka jaka, kata hadien ba ka la don ka jingkyrpad na ka liang ki nongialam ka HPC.

Na ka liang u Myntri u pynpaw ruh ia ka jingsngew skhem ba baroh ki arliang kin lah ban weng ia kane ka jingeh ha kane ka jingialang ka ban wan.

“Lehse ngin lah ban pynbeit noh ia kane ka mat mynta hi u snem. Watla katta, shah ba ngin iakynduh shwa khnang ba ngin tip kaei ka rai ba khatduh ka ban mih,” u la ong shuh shuh.

Halor ka jingkylli, u Bah Dhar u la ong ba na ka liang ka HPC ka la buh ka jingkyrpad na ka bynta katto katne ki jingpynbeit kiba khyndiat ha kaba iadei bad ka blueprint ba la pynkhreh da ka sorkar jylla.

Nalor kata u la ong ba na ka liang ka sorkar jylla ruh kan khmih bad pyrshang ban pynbiang ha kata ka rukom khnang ban lah ban pynbeit noh ia kane ka kam.