Khot Ïashimbynta Ka DIPR Ban Buh Ïaka Synduk Sah Jingkynmaw

Syllad | The Rising MeghalayaJanuary 18, 2022

Ka sorkar jylla kum shi bynta na ka jingrakhe ia ka jingap 50 snem ka jingioh jylla ba pura, lyngba ka ophis Director of Information and Public Relation, Shillong ryngkat ka jingiatreilang bad ka Northeast India AV Archive, kala don jingmut ban buh ia ka wei ka “Synduk Sah Jingkynmaw” ne ka “Memory Crate” ban thep ia kino kino ki jingthoh ha kane ka kynti bad ia kane ka synduk yn sa plie pat hadien 50 snem kata ha 21 tarik Kyllalyngkot (January) 2072.

Ha kane ka synduk yn thep kum ia ki:-

1. Shithi na ki nongshong shnong.

2. Ki kot ba pynmih ha ka dur jong ki Magazine ne ki Souvenir.

3. Ki dur (Photograph) jong ki District Head Quarter hapoh ka jylla.

4. Ki dur lane ki jingdro jong ka ri lum Khasi, Jaintia bad Garo naduh ki snem 1800s haduh 1900s.

Kumta ka sorkar ka khot bad kyntu ia ki paidbah nongshong shnong ka jylla ban iashim bynta shitrhem khnang ba ki jingthmu jong ka sorkar kin long kiba jop.

Ia kine ki shithi, ki kot lane ki dur phi lah ban pynpoi ha ophis treikam jong u Assistant. Director Information & Public Relations, Jowai kaba don ha Mission Compound, Jowai hapoh ka 18.01.2022 ha kipor ba long trei.