Khot jingialang ka JHTOA haka 1 tarik Nohprah ba shah shet ha ki karkhana dewbilat

Syllad | The Rising MeghalayaNovember 27, 2021

Ka Jaintia Hills Truck Owners’ Association (JHTOA) kala khot jingialang biang haka 1 tarik u Nohprah hadien ki karkhana pynmih dewbilat kim shym la pyntreikam ia ka dor bai kit bai thymmai haka dor T.7 shi metric ton shi kilometre.

Kane ka jingialang ki trai trok kan long ha ophis treikam ka JHTOA ha Tuber Takhniang.

U president JHTOA u Nidamon Chullet ula ong ba kane ka jingialang ka dei ban shim iaka jingmynjur lang ki trai trok bad kaei ka sien jam ba kin shim nangne shakhmat namar ba ki karkhana dewbilat ha Jaintia Hills kim shym la pyntreikam ia kaei kaba la iakren pynbeit, kata ban ai iaka bai kit bai bah thymmai T.7 shi metric ton shi kilometre.

Katkum ka rai ki karkhana dewbilat kila mynjur ban ai iaka dor bai kit thymmai naduh 15 tarik u Naiwieng, pynban kine ki karkhana kila leh bymsuidniew ia kaei kaba la dep ban pynbeit. Ha kane ka jingialang ngin shim iaka rai bad ngin pynbna ia ki lad jingiakhih kiba tyngeh, la ong u Nidamon Chullet.