Khot jingïalang ki nonghikai SSA East Khasi Hills ha sor Shillong ban ïakren ïaka tulop bad kiwei ki jingeh
SHILLONG: Ka Meghalaya SSA School Association (MSSASA) kan pynlong ia ka jingialang jong ki nonghikai SSA kiba hap hapoh ka East Khasi Hills District ha ka 10 tarik mynta u bnai ha ïing dorbar jong ka Riatsamthiah, Shillong kaba don marjan bad ka Christian Academy Higher Secondary School ha ka por 10:30 mynstep.
Ha u kyrwoh ba la phah da u Bah F Wanniang, Bah S. Khriam, Bah JJ Lyngkhoi bad Bah JL Khongsngi kiba la jied da ka MSSASA Central Body ban peit shipor ia ka MSSASA East Khasi Hills District Unit, kila pyntip ba ia kane ka jingialang (General Meeting) la khot katkum ka rai jong ka General Executive Meeting jong ka MSSASA Sengkmie kaba la long ha ka 8 tarik u Naiwieng, 2019.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha katei ka jingialang yn sa iadonlang ruh ki nongialam jong ka central body naduh u President Bah Aristotle C Rymbai, General Secretary Bah Ralbingland L Nonglait bad kiwei de ki dkhot ka Sengkmie ban pynsngew bad pynshai sha ki nonghikai SSA ka East Khasi Hills District ia ki rai jong ka general executive meeting nalor kiwei de ki kam kiba iadei bad ka jingiakynduh jingeh jong ki nonghikai SSA hapoh East Khasi Hills District khamtam ha kaba iadei bad ka jingbym pyllait biang por ia ka tulop sha ki nonghikai SSA na ka por sha ka por da ka Office jong ka DMC bad SDSEO hadien ba la pyllait ia ka fund da ka Office jong u State Project Director, SEMAM-SSA.
Kumjuh ruh yn iakren halor ka jubab bala ioh na u Deputy Secretary, ka tnat ka School Education bad Literacy, MHRD, ka Sorkar India bad ka office jong ka State Education Mission Authority Meghalaya, Shillong (SEMAM) ha ka 14 tarik u Naiwieng, 2019 kaba iadei bad ka jingpan jingshai halor ki kam kiba iadei bad ka jingthungkam ia ki 5814 ngut ki nonghikai SSA Lower Primary bad 6727 ngut ki nonghikai SSA Upper Primary hapoh ka scheme ‘Samagra Shiksha’, kaba ha kine ki khyndiat bnai ba la dep la buh ia ki nonghikai SSA ha ka jing kulmar jingmut hadien ba la paw ha ka Project Approval Board (PAB) 2019-20 na ka bynta ka Jylla Meghalaya ba ki nonghikai SSA Lower Primary kidei contractual bad ki nonghikai SSA Upper Primary kidei regular. Yn pynsngew ruh ia ka kaiphot jong ka jingiakynduh ki nongialam ka MSSASA Sengkmie ia u Myntri ka tnat pule puthi u Ma Lahkmen Rymbui ha ka 26 tarik u Naiwieng, 2019 ban buddien bad iakren ia katei ka mat nalor kiwei de ki mat jingdawa jong ka Seng kiba iadei bad ki nonghikai SSA.
La kyntu ia baroh nonghikai SSA jong ka East Khasi Hills District ban pyllait por khnang khnang bad wan sha katei ka jingialang ban ioh ia ka jingshai kaba bniah.
Leave a Reply