Khot jingïalang kyrkieh ka JAC, kyrpad u DC East Jaintia Hills ban kit dewbilat

Syllad | The Rising MeghalayaJune 19, 2020

Ka Joint Action Committee kaba kynthup ïaka Jaintia Hills Truck Owners Association (JHTOA), Meghalaya Truckers Union (MTU) bad ka All Jaintia Cement Clinker Transporter Association (AJCCTA) kala khot ïaka jingïalang kaba kyrkieh haka 20 tarik Jylliew haka por 9 baje mynstep ha Phramer ha ophis ka JHTOA.

U Nidamon Chulet, nongialam ka JAC, ula ong ba u Deputy Commisioner, East Jaintia Hills District ula phah shithi sha ka JAC ban kyrpad ban weng ïaka jingïakhih ban sangeh kit dewbilat bad clinker na ki kharkhana dewbilat bad ban sdang ïaka jingkit iaki mar ba pynmih ki dewbilat kumba ju long baroh shikatta.

“U Myntri Rangbah ka Jylla bad u Myntri ka tnad Transport bad Commerce & Industries kila shimkhia ban ïakren ïa kane kam kumjuh ïaka ka dor bai kit mar thymmai ki trok haka jylla katkum ka jingpynbna jong ka sorkar jylla haka 13 tarik Kyllalyngkot 2020” la ong ka shithi u DC East Jaintia Hills.

U Nidamon ula ong halor kane ka shithi kaba la phah da u DC East Jaintia Hills kila rai ban khot da ka jingialang kaba kyrkieh lashai ka sngi, khnang ban shim iaka rai uba bun balang la yn weng ne bteng iaka jingiakhih jong ka JAC. La kyrpad iaki dkhot jong ka JAC baroh ban wan sha kane ka jingialang khnang ba ki jingthmu jong ka JAC kanlong kiba jop.

Kumban shu pynkynmaw ba ka JAC hadien ba kala sdang ka jingiakhih ha kane ka 15 tarik, ka tnad Transport bad u Myntri Transport bad kharkhna ula khot iakren bad ula bthah ia u DC East Jaintia Hills ban khot jingialang kaba long haka sngi Palei, hynrei kane ka jingialang kala kut khlem soh khlem sla bad ai por shitaiew ban pynbeit ka JAC bad ki kharkhana dewbilat.