Khot ka Sorkar ia ki kompeni shimet ban pyndap ia ka jingdonkam bording ha ka jylla

Syllad | The Rising MeghalayaFebruary 5, 2025

U Myntri ka Tnad Bording u AT Mondal ha ka 4 tarik Rymphang u la ong ba ka sorkar ka pynshlur ia ki kompeni shimet ba kin wan ban pyntrei ia ki projek bording khnang ban lah ban pyndap pynbiang ia ka jingdonkam bording kaba la nangkiew ha ka Jylla Meghalaya.

“Ngi la pynmih ia ka jingpynbna ia ka polisi treikam bathymmai halor ki kam bording ha kaba ngi la kyntu wat ia ki kynhun shimet kiba pyntrei ia ki bording ba kin wan trei ia ki projek pynmih bording namar ka jingdawa bording ha ka jylla ka la nangkiew bad ngi dei ban pynthikna ruh ba ka dei kaba lah ban siew,” ong u Mondal haba kren sha ki lad pathai khubor.

“Nga kham sngewtynnad ia ki hydel project ha kaba iadei bad ki kynhun shimet namar ngi ioh ei 12 percent ka bording, kata kaba dei ka hok kaba ngi dei ban ioh, kumta kam don ka jingkylli ha kaba iadei bad ka bai lutksan kaba wan hapdeng,” u la ong.

Haba kylli, u Myntri u pyntip ba ka jylla ka la dep ban ia soi ia ka Memorandum of Understanding (MoU) bad ka NEEPCO na ka bynta ka Wah Umiam power project, hynrei namar ki kam iakajia jaka ki la pynslem noh ia ka jingiaid jong ka kam. U la ong kyrmen ba yn lah ban pynbeit noh kloi. Kane ka dei ka project kaba 85 MW ka hap hapdeng ka Shella bad ka Mawsynram constituency.

“Ngi long kiba la pynkhreh ban iasoi ia ki MoU kiba thymmai bad kino kino ki kynhun. Katto katne na ki MoU ki la shu sahteng,” u la ong da kaba bynrap, “Ki don kiba dang iakren pynbeit, bad ngin sa ia peit. Ki don katto katne ki MoU kiba la sahteng mynta lah palat shiphew snem hynrei ki kynhun bathymmai ki la nangwan bad pynpaw ia ka jingdon mon ban pyntrei ia ki project,” u la bynrap.