Khot ka VPP Khliehriat da ka jingialang paidbah haka 18 tarik Nailur halor ka surok bah NH 6

Syllad | The Rising MeghalayaSeptember 15, 2023

Ka Voice Of the People Party (VPP) Khliehriat Circle kala khot da ka jingialang paidbah halor ka surok bah National Highway 6 haka 18 tarik Nailur.

U president VPP Khliehriat u Damewanhi L Rymbai ula ong ba kane ka jingialang paidbah ka long ban sngew iaka sur u paidbah halor ka NH 6 hadien baka sorkar kam sngap bad kam patiaw iaka jingeh u paidbah

Ka jingsniew ka surok bah NH 6, katba nang iaid ki por kala nangjur, ka jingjia ba sngewsih kala nang jingjia, ka jingkylla ka kali, ka jingaksident ka jia man ka sngi bad na kaliang ka VPP kala rai ban khot iaka jingalang haka 18 tarik Nailur haka Teilang Playground, Dkhiah West ban ioh sngew iaka sur u paidbah.

“Mynta ngi ioh ia kane ka surok, pynban ka long jingma haka iaid ka ieng, Ngi tip ba ka surok ka long u budlum ka roi ka par, pynban haba peit iaka jinglong jingman ka surok ka long ka jinglehrain khamtam iaka district headquarter kaba ha shilynter jong ka Khliehriat ka surok kala sniew shaduh sha Malidor,” la ong u Damewanhi L Rymbai bad bynrap ba ha kane ka sngi kin shim iaka rai.

Ka VPP kala khot lang ia baroh ki nongshong shnong naduh ki nongialam sain pyrthei, ki sengbhalang, ki seng samla, ka Synjuk ki Waheh Shnong, ki seng kali kamai, ki seng ki nongniah trok, ki seng longkmie bad ki riew shimet kiba don ka jingkitkhlieh na ka bynta ka bha ka miat ba kin sngewbha ban wan sha kane ka jingialang ban shim iaka rai ban iaid da kawei ka sur ban pynsngew sha ka sorkar