Khot kyrkieh u VC ka NEHU ia ka jingialang ka EC ban iakren halor ki jingdawa ki samla pule

Syllad | The Rising MeghalayaNovember 9, 2024

U Vice Chancellor ka North Eastern Hill University (NEHU) u Prof Prabha Shankar Shukla ha ka 8 tarik u Naiwieng u la khot ia ka jingialang kaba kyrkieh jong ka Executive Council ban iakren halor ki jingdawa ba la buh hakhmat da ka North-Eastern Hill University Students’ Union (NEHUSU).

Ia kane ka jingialang la khot pynlong da ka jingthmu ban pynbeit noh ia ki jingdawa jong ka NEHUSU kaba kynthup ia ka jingweng kam ia u Registrar bad Deputy Registrar bad halor ka jingthung ia ki Pro-Vice-Chancellor na ka bynta ka NEHU Shillong bad Tura Campus.

Hynrei, namar ki jingpynthud kiba mih na ka jingiakhih jong ki samla pule, u VC um shym la lah satia ban pynlong ia kane ka jingialang jong ka Executive Council.Kane ka la khanglad ia ki bor pyniaid ka University ba kin pyniaid shakhmat ia kane ka kam ban pynbeit ia ki jingdawa jong ki samla pule.

Kumta ruh na ka liang u VC u la kyrpad ia baroh ki samla pule ba kin wan sha ka jingiakren na ka bynta ban ia pynbeit noh halor ki jingdawa ki jong ki.

Kane ka skulbah ka la ngat ha ka jingkhangdam kaba pura namar kane ka jingiakhih jong ki samla pule ba la ialam da ka NEHUSU bad ba la kyrshan da ka KSU-NEHU Unit kaba la kynjoh saw sngi mynta ban pynpaw pyrshah ia ka jingpulom jong u VC ban weng kam ia u Registrar bad Deputy Registrar, ia kaba la kynnoh ba ka jingthungkam ia ki ka dei kaba long beain.

Haba pynpaw ka jingsngewkhia ia ka long ka man jong ki samla pule, u Prof Shukla u la ong, “Nga la pyrshang ban iakren  markhmat bad ki samla ban ia pynbeit halor kine ki jingdawa ki jong ki bad kyrpad ruh ba kin sangeh noh ia ka jingshah thngan ka jong ki.Nga don ka jingsngewkhia halor ka jingshah ktah ka jong ki ha ka liang ka koit ka khiah.Hynrei la kyntu ia Nga da ki Magistrate ba ngan kiar na ka jingleit jngoh ia ki samla pule namar ka jingbym shngain.”

U Prof Shukla u la iai ban halor ka jingkut jingmut ka jong u ban leh ei ei halor k jingdawa jong ki samla pule, hynrei u la kdew ba khlem kano kano ka jingiakren ka jinglah ban pyniaid shakhmat ka long kaba shem shitom.U la kyrpad beit beit ia ki samla pule lyngba u kyrwoh da kaba kyntu ba kin pynkut noh ia ka jingshah thngan bad ban wan sha ka miej jingiakren ia pynbeit.

Kumba ka long mynta ki la nang bun ki samla kiba iashim bynta ha ka jingshah thngan kiba la kem pang bad ia kiba la hap ban pynkit noh shapoh hospital.

Ki la don biang sa arngut ki samla pule kiba la poi hospital ha ka 8 tarik u Naiwieng hadien ba ka jingiakhih shah thngan ka jong ki ka la palat ia ka 78 kynta.Ia kine la pynkit noh shapoh Shillong Civil Hospital.Ha ka 7 tarik u Naiwieng ki la don lai ngut kila shah kit sha Hospital ha kaba arngut napdeng jong ki, kila ioh ban leit phai sha la iing.

Baroh lang ki la don haduh 19 ngut ki samla pule kynthup ki nongialam ka NEHUSU bad KSU kiba la iashim bynta ha ka jingshah thngan.