Khot sngewbha ka Lympung Lum Kur Dhar ia baroh ki para kur sha ka dorbar ha Mulieh

Syllad | The Rising MeghalayaJanuary 15, 2025

Ka Lympung Lum Kur Dhar (LLKD), Jaiñtia Hills ka khot sngewbha ia baroh ki Kur kiba don ha Rilum Jaiñtia bad na shabar u pud, kum na Khasi Hills, na Assam bad na Bangladesh bad na kiwei de ki jaka ba kin sngewbha ban iawan sha kane ka Dorbar Kur kaba shisien shisnem (Annual General Meeting) 2025.

U kyrwoh bala phah da Publicity Secretary ka kur u ma Subas Dhar, ula pyntip ba ia kane ka Dorbar jong ka Kur Dhar yn pynlong ha ka shnong Mulieh, West Jaiñtia Hills kaba hap hapoh ka Laskeiñ C&RD Block ha ka 18/01/2025 naduh ka por 10:00 AM. Ha kane ka Dorbar Kur yn iadon bynta lang u ma Sniawbhalang Dhar, uba dei u Deputy Chief Minister ka sorkar Jylla kum u Kongsan (Chief Guest), ha ka jingiadon ryngkat kiwei de ki rangbah jong ka Kur na ka Central Body, Jowai bad Shillong.

Ka shnong Mulieh ka jngai kumba 29 Km tam na nongbah Jowai haba leit lyngba ka shnong Mookyndeng.

Ki lynti ban poi sha ka shnong Mulieh ki don lai tylli. Kawei lada iaid na Lad-Pasyih bad poi sha shnong Kyndongtuber-Pammanik-Mulieh. Kawei lah ban iaid na shnong Shangpung Khliehmuchut da kaba phai sha ka liang ka diang bad shwa ban poi shnong Pammanik don ka lad ban phai sha ka liang ka mon ban poi sha Mulieh. Kawei pat kadei kaba iaid lyngba ka shnong Raliang-Mowkyndeng bad phai sha ka liang ka diang ban poi sha Mulieh.