Khot tender ban sdang ka jingpynheh ia ka kad liengsuin Shillong Airport

Syllad | The Rising MeghalayaApril 7, 2025

Ha ka jingpynbna ka ba long shisha ka jingkmen bad ka jingkyrkhu kaba khraw na ka bynta ki nongshong shnong ka Jylla Meghalaya, ki bor pyniaid ka Airports Authority of India (AAI) ki la khot ia ka Tender na ka bynta ban sdang noh ka jingshna pynheh ia ka kad liengsuin jong ka Shillong Airport.

Kane ka sienjam ka la wan urlong lyngba ka jingshimkhia bad ka jingtrei borbah jong ka sorkar Jylla hapoh ka jingialam jong u Myntri Rangbah u Conrad K Sangma uba la buh hakhmat eh ia ka thong ban kyntiew ia ki lad pyniasoh lyngba ki liengsuin.

Kane ka jingpynheh ia kane ka kad liengsuin kan kynthup sa na ka bynta 571 mitar na kaba la don lypa bad ka ban kynjoh baroh ha ka jingjrong kaba 2,400 mitar. Kane kan iarap ban pynsuk ia ka jingtreikam jong ki liengsuin A-320 ha Shillong. Nalor kata kane ka project kan kynthup ruh halor ka jingpynheh ia ki terminal building bad apron nalor kiwei pat ki jait jingtei. Katkum ka tender notice, ka jingmang na ka bynta kane ka jingpynheh ia kane ka kad liengsuin ka long T.119.44 klur, bad la khmih lynti ba yn lah ban pyndep ia kane hapoh ka 18 bnai, kata kynthup ia ka jingkhang kaba lai bnai ha ka por slap.

Na ka liang u Myntri Rangbah ka Jylla u Conrad K Sangma u la ong, “Kane ka dei ka khyllipmant kaba wanrah ka jingsngew hun bad ka jingkmen kaba khraw na ka bynta ka jylla Meghalaya. Kane ka jingpyllait tender na ka bynta ka jingpynheh ia ka Shillong Airport ka dei ka jingmih lyngba ka jingtrei shitom ka jong ngi naduh kine ki snem kiba la leit.Ka jingpynbha bad kyntiew ia ki lad pyniasoh da ki liengsuin kam dei tang na ka bynta ban pynsuk hynrei khamtam ban wanrah ka jingkylli ha kiba bun ki liang, kata ka ban kyntiew ia ki kam jngohkai pyrthei, ka jingkhring ia ki lad bei tyngka bad ka jingplielad ia ki samla ka jylla ha ka liang ka ioh kam ioh jam.”

Naduh ba la shimti ha ka bor na ka liang u Myntri Rangbah u la shimkhia ban iakren halor ka mat ban pynheh ia ka Shillong Airport bad ka Sorkar Pdeng ha kiba bun ki khep. Kane ka project la khmih ba ka dei ka jingangnud jong ka jylla ban kylla long ka jaka jngohkai pyrthei bad ka jaka ka ban khring ia ki nongbei tyngka hapoh ka ri.

Ka AAI ka la dep ban aiti ia ka Draft Master Plan na ka bynta kane ka jingpynheh ia ka kad liengsuin ha u bnai Nailar 2024, bad ka jingshim jaka na ka bynta ka jingpynheh kaba haduh 22 akar na ka bynta kane ka project kala dep iaid shakhmat. Kane ka jingpynheh ia kane ka kad liengsuin la khmih lynti ba kan pyniasoh bad sorbah kiba heh jong ka ri India, bad ka ban plie lynti ha ka ban khring ia ka jingwan tuid ki nongshangkai pyrthei, ka leit ha wan ha ki kam khaii pateng bad ka jingpyniasoh lang ia ka thain. 

Ka sorkar Meghalaya ka la buh thong ban kyntiew ia ka jingbei tyngka ha ki kam jngohkai pyrthei da ka jingkut jingmut ban pynlut haduh T.4000 klur ban shna ia ki jaka jngohkai pyrthei kiba thymmai bad pynbha ia kiba la don lypa. Ka sorkar kala bteng ruh ban trei borbah ban khring ia ki nongbei tyngka kaba kynthup ban shna thymmai ia ki resort kum ha Umiam, Shillong, bad New Shillong ka ban plielad shibun ia ki samla ha ka liang ka ioh kam ioh jam.

Lah ban kdew ba ha u bnai Nohprah 2024, ka sorkar ka la buh ia u mawnongrim na ka bynta ka Shillong Ropeway Project, kaba dei ka project kit briew kaba nyngkong eh ka jylla kaba thmu ban pyniasoh bad ki jaka jngohkai bad ki jaka ba pawkhmat ha ka kolshor ha kylleng ki jaka jong ka nongbah Shillong khnang ban kyntiew ia ka kam jngohkai bad pynsuk ia ka leit ka wan ha ki jaka sor.

Ka Ropeway Project ha ryngkat ki jingthmu kiba iadei bad ki kam jngohkai pyrthei kiba don ha Mawsynram, Mandalgre, Marngar, bad Wahkhen ki la long kiba la khreh ban plielad ha ka laing ka iohkam ioh jam na ka bynta ki samla trai shnong ha ki thain bapher bapher jong ka Jylla.