Khot u Chief Justice ka Meghalaya ban iakhun pyrshah ia ki kam lehbor pyrshah ia ki khunlung khynnah bad ka jingeh halor u drok

Syllad | The Rising MeghalayaSeptember 17, 2023

U Chief Justice jong ka iingbishar Meghalaya High Court, u Justice Sanjib Banerjee u la pynlong ka jingkhot halor ka jingdonkam kyrkieh ban iasnohktilang na ka bynta ban iakhun pyrshah ia ki kam bymman kiba harukom, kynthup halor ka jingsaphriang jong u drok bad ki kam lehbor (sexual abuse) pyrshah ia ki khunlung khynnah.

Ia kane u Chief Justice u la pynpaw haba ai jingkren ha ka Mega Camp cum Awareness Programme kaba shi sngi haka sngi Saitjain ha kaba iadei bad ka NALSA Scheme bad Government Welfare Schemes halor ka mat “Bridging the Gap,” ia kaba la pynlong ha madan jong ka Sein Jait Tuber Higher Secondary School ha Tuberkmaishnong, East Jaintia Hills District.

UJustice Banerjee u la pynpaw ka jingsngewkhia kaba jur halor ki jingjia jong ka jingshah lehbor jong ki khunlung khynnah, kata khamtam da kiba haiing hasem jong ki hi, ha kaba u la kyntu ia ki nongiashim bynta ba kin iatylli lang pyrshah ia kiba kum kine ki kam bymman, kata kynthup ha kaba iadei bad ka jingkynrei jong ki nongpyndonkam ia u drok.

Nalor kata u la pynpaw ruh halor ki jingkylla kiba bha kiba ka jingioh jinglaitluid ka la pynioh, ha kaba kito ki kynhun kiba la shah banbor ha ka imlang ka sahlang ki la ioh ia ki lad ki kabu bad ban mihkhmat kum ki nongialam ha baroh ki jait kam bapher bapher. Hynrei, u la pdiang pat ba ki don ki kam bymman, kata kum ki kam thombor kiba jia ha ki longiing longsem pyrshah ia ki kynthei kiba dang don haduh mynta. U pynshlur ruh ia ki longkmie ba kin pyntip ia kiba kum kine ki jingjia shah thombor sha ki bor jong ka ain.

Nalor kata u Justice Banerjee u pynpaw ruh ka jingsngewkhia ha kaba iadei bad ka jingtrei borbah jong u drok hapoh ka imlang ka sahlang bad khot ruh ia ki kmie ki kpa, ki nonghikai, ki nongialam shnong, ki khynnah pule ba kiwei pat ban long kiba peitngor bad bteng ban iakhun pyrshah ia ki jingeh kiba mih lyngba une u jait jingdih ba shyrkhei.

Ha kaba iadei bad ka jingpynrung kyrteng na ka bynta u Aadhaar, u Justice Banerjee u la pyntip ha ka jingialang ba ka jingpynrung kyrteng hapoh ka Aadhaar hapoh  East Jaintia Hills District ka la kot sha kumba 82%. U la kyntu ruh ia ki kynhun kiba ia don bynta, kaba kynthup ia ki nongialam shnong, ki riew rangbah, ki nonghikai bad kiwei pat ba kin pyniaid shakhmat ha kaba iadei bad kane ka jingpynrung kyrteng Aadhaar hapdeng ki 18% ki nongshong shnong kiba dang sah namar kiba bun ki nongshong shnong ki la ioh pdiang ia shibun ki jingmyntoi lyngba ka jingpyniasoh ia u Aadhaar nombor.

Shuh shuh u la kyrpad ia ki paidbah ba ki dei ban kiar na ki kam tih dewiong beain lyngba ka juk rim ba la tip kum ka ‘rat hole mining’ kata hadien ba ka sorkar ka la wanrah ia ka rukom tih lyngba ka juk jingstad kaba thymmai.