Khot wer iaki kmie ki kpa ban ai dawai Polio

Syllad | The Rising MeghalayaMarch 4, 2024

Ka West Jaintia Hills District ka la sdang ia ka jingai dawai polio ha ka 4 tarik Lber ia kaba la plie da u Assistant Commissioner u Bah S Phanbuh ha ka prokram ba la pynlong hapoh MCH Hospital ba 100 jingthiah ha Panaliar Jowai.

Haba kren ha ka jingplie ia kane ka prokram ai dawai polio sha ki khynnah hapoh kane ka hospital, na ka liang u Bah Phanbuh u la aijingmut ia ki kmie ki kpa ba kin ialam ia la ki jong ki khun rit kiba hapoh ka 5 snem rta sha ki jaka ba la pynkhreh ban iashim bynta ha kane ka jingai dawai khnang ban iada ia ki khun rit jong ki na kane ka jingpang polio.

Kumjuh na liang ka Dr. Helen J Uriah, District Maternal and Child Health Officer ka la iai ban halor ka jingdonkam ban ai dawai polio ban iada ia ki na ki jingshitom kiba lah ban ktah hadien habud kiba don jingiadei bad ka jingpang polio.

Ka la ong ruh ba ia kane ka jingai dawai yn pynlong ha baroh ki Polio booths centre ba la pynkhreh ha ki kyntoit bapher bapher hapoh sor Jowai, ha ki jaka sumar bad ki shnong khnang ban pynioh ia ka jingai dawai polio sha baroh ki khynnah kiba hapoh ka 5 snem rta.

Kane ka jingai dawai polio ka la sdang hynne ka 4 tarik bad kan kynthup ia baroh kawei ka district bad bteng haduh ka 6 tarik Lber 2024, kata lyngba ka jingleit sha man ki thliew iingbriew ha ka 5 bad 6 tarik mynta u bnai.

Ha kane ka prokram la ia don lang ruh ka District Medical & Health Officer ka Dr. Evalyneda B.V Laloo, ki doktor bad ki staff nurse ka MCH Panaliar, Jowai bad kiwei kiwei.