Khot wer ka HYC naduh Sorkar Nongmihkhmat Sengbhalang ban ïatreilang da ka jingïatylli ban pynbeit ïa u pud u sam ka Meghalaya
Ka kam Border issue la kadei ka international border dispute lane ka interstate border dispute ka la dei ka Kam kaba jyrwit bha. Ki phew snem ki la leit..Bun bah ki briew kila iap bad mynsaw, ki ing ki sem, ki jingthung jingtep bad ki jingri Jong ki briew ki la shah leh tohmet bad shah pynjot, ka hok longbriew ka la shah iuh roit, ka roi ka par kala sahkut bad kyntang iawai ki riew shimkabu bar ri bar jylla kiba bam armaloi bad bam sap ruh ki la kynrei.
Ka jingbym lah ban pynbeit ia u pud u sam bad ka Ri Bangladesh bad kumjuh ruh bad ka Assam ka la dei ka jinglehrain ia ngi kum ka jylla hi baroh kawei. Lada kane ka kam ka dang neh sah kumne ngi la thikna ba bun bah ki jingsngewsih kin nang lap ia ngi. Ka por ka dawa iaka jingpynbeit pud kham kloi katba lah.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha ka HYC ngim idon jingmut shuh ban bein ne kynnoh iano iano, kam myntoi shuh ban beiñ ban kynnoh ia kiba la dep, kaba ngi donkam ka long ba ngin shim hikai na kipor kiba ladep. Ka seng nyngkong eh ka ai khublei ia baroh ki riew shlur jong ka jaidbynriew kiba la trei shitom ban khih ban ksar na bynta kane ka mat. Ngi sngew nguh ia baroh ki paradoh kiba sah ha ki thain border kiba la long ki shipai iada pud Jong ka jaidbynriew. Khlem maphi ki paradoh kiba sah ha ki thain border lehse mynta ngi la shah klun lut ki jaka ha ka Bangladesh bad ka Assam.
Para Ri, na ka liang ka HYC ka khot ka wer mynta iaphi baroh ba ka por ka dawa ia ka jingiatylli bad iatreilang jong baroh ban pynbeit noh ia kane ka kam, ngi donkam ka jingiatreilang jong baroh ha kum kane ka por. Ngi kyrpad ia u Chief minister, Minister, leader opposition, speaker, MLA, CEM bad MDC na KHADC bad JHADC bad ki politician baroh ba sngewbha nai pynlong politics ia kane hynrei to iatreilang baroh da kawei ka sur bad kawei ka jingmut.
Ngi kyntu ia ki officer la ki dei ki IAS, IPS, MCS bad baroh ki nongtrei sorkar ba phin iarap naduh ka mynsiem jong phi ban ngin ioh pynbeit noh ia u pud u sam ka jylla. Ngi da kyrpad kyrpang eh ia ki Dorbar Trai Ri naduh ki dorbar hima, dorbar elaka, dorbar raid, dorbar shnong bad ki dorbar kur ba phin ia shimkhia ban iada bad pynneh la u pud bad kumjuh ruh ban ai ka kti ka mon kadiang jong phi sha kaban iada ia la u pud u sam.
Kyntang iawai ngi kyntu iabaroh ki sengbhalang ba ka por kala dei ban ia mih ryngkat lang ban long ka sur bad ka bor kaba khlain ban kyrshan, ban ai jingmut bad ban pynkynmaw ia ki bor sorkar bad ki Dorbar Trai Ri ba kin trei shitom ban iada bad pynbeit noh ia u pud u sam ka jylla. To ngin kut jingmut ba ngin pyndep noh ia kane ka kam khnang ba ki long dien bad ki khun kynnah jong ngi kin nym mat shuh ia ki jingeh kiba ngi mat mynta, to ngin long lakloi ban aiti ia ka jingsuk ka jong ngi mynta ban pyntikna ba pa pateng ban wan kan bit kan biang.
- Robertjune Kharjahrin
- President HYC
Leave a Reply