Khot wer ka Seinraij Kongwasan Chyrmang sha ka lehniam Behdienkhlam ka raij

Syllad | The Rising MeghalayaApril 27, 2025

Ka Seinraij Kongwasan Chyrmang Kmai haka 27 tarik Iaiong kala pyntip paidbah ba kumba ju long manla u snem, mynta u snem ruh kan pynlong iaka lehniam Behdienkhlam naduh 30 tarik Iaiong haduh 1 tarik Jymmang 2025 ha Chyrmang.

Haba kren sha ki lad pathai khubor u president Seinraij Kongwasan Chyrmang u ma Elad Dkhar bad u General Secretary ma Kerlang Lakiang haka jingiadonlang u Wasan ka Seinraij u ma Bishar Talang kila khot wer ia baroh sha ka jinglehniam Behdienkhlam jong une u snem.

U Presdent Seinraij Kongwasan Chyrmang Ma Elad Dkhar ula pynpaw iaka jingkmen ba sa shisien ka Behdienkhlam kala wan biang bad ula khot wer sngewbha ia baroh bad iaki riewngeit Niamtre ha Khasi Jaintia sha ka lehniam Behdienkhlam. “Da ka jingwan ka jong phi kan pynlong iaka Behdienkhlam jong ngi kaba shongshit bad kaba phuh kaba phieng,” ula bynrap.

Na kaliang u ma Kerlang Lakiang, General Secretary ula ong ba naduh ka 19 tarik Iaiong u Langdoh ula sdang iaka jinglehniam, ka 24 tarik Iaiong la pyndep iaka Thoh Ryngkaw.

Ula ong ruh ba ka Behdeinkhlam ka Chyrmang ka dei kaba nyngkong eh kaba pyndep ha Rilum Jaintia, hadien bud sa ka raij Jowai bad Tuber. Ka jinglehniam la pyndep katkum ka jinghikai uba barim bajah ban da ka jingngeit ban beh iaka sniew ka smeh bad ka pang ka shitom.

Ula ong ba hadien ba pyndep iaka jinglehniam ki khun ka Raid kiin ioh ban hiar sha ki hali ki lyngkha jong ki ban pynhap ia u symbai u phniang ne ban bet ia u kba u khaw.