Khreh ka Assam ban shna BOP ha wah Langsangti kaba hap ha Lapangap, pyrshah ka dorbar shnong

Syllad | The Rising MeghalayaDecember 29, 2022

U MLA bad ka Executive Member ka Karbi Anglong Autonomous Council (KAAC) kiba kynthup ia u Rupsing Teron bad ka Rina Terangpi kila hiar jurip haka wah Langsangti kaba hap ha khappud Meghalaya bad West Karbi Anglong Assam ban shna ia ka border outpost.

Kane ka jingwan jurip kine ki nongmihkhmat ka Karbi Anglong kala wanrah ka jingpyrshah kaba jur na ka dorbar shnong Lapangap Pyllun namar ba kane ka wah Langsangti ka hap haka shnong Langkiroi ka jaka kaba dang hap hapoh u pud u sam jong ka Dorbar Shnong Lapangap, West Jaintia Hills District.

Haba ïakren bad u waheh shnong ka Lapangap u Ma Deimonmi Lyngdoh ula ïathuh ba ka Sorkar Assam ka la wan ban jurip jaka haka 28 tarik Nohprah 2022 ha wah Langsangti kaba ju khot ka wah Ïong-O ne ban shna iaka BOP Border Outpost. Kane ka jaka ka iaid lyngba ïaka surok jong ka shnong Lapangap-Khanduli ba la pyntrei langba ka scheme MGNREGA daka Shnong Lapangap, Khanduli, Umshangiar bad Pdeiñ Talo naduh u snem 2021. Kane ka surok ka dei kaba pyndonkam da kine ki shnong ban leit iew leit hat bad leit rep leit riang, la ong u Waheh Shnong.

U Ma Deimonmi ula ong ba na la liang ka Dorbar Shnong Lapangap Pyllun ka la pyrshah ïa katei ka jingthmu jong ka Sorkar Assam ban buh BOP hajan katei ka wah. Ula ong ruh kane ka jaka ka dang hap hapoh ka u pud u sam jong ka Shnong Lapangap Elaka Shilang Myntang bad ka dei ruh ka jaka rep.

Na kaliang une u nongialam shnong ula kyntu iaka bor district West Jaintia Hills ban shimkhia ban khanglad ia kane ka jingthmu ka sorkar Assam kat dang biang ka por, khnang ban suk ban sain ki paid nongshong shnong ka Lapangap Pyllun.