Khring ki nongking lieng Kayak ha ka tamasa ‘Meghalaya Kayak festival 2023’ ha Wah Umtrew

Syllad | The Rising MeghalayaOctober 13, 2023

Ka  Jylla Meghalaya haka 12 tarik Risaw, sa shisien pat ka la ioh biang ban sakhi ia ka tamasa king lieng ha ka sien kaba hynriew ia kaba kaba la tip kum ka Meghalaya Kayak festival 2023 ba la pynlong ha ka Wah Umtrew, kaba hap hapoh ka shnong Umtham, Ri-Bhoi District.

Ia kane ka tamasa king lieng kaba la sdang haka 12 tarik Risaw bad ka ban bteng haduh ka 14 tarik mynta u bnai la khot pynlong da ka Ri-Bhoi Water Sports & Tourism Cooperative Society Ltd ha ryngkat ka jingiatreilang bad ka Tnad Sports & Youth Affairs ka Jylla bad ka Indian Kayaking and Canoeing Association (IKCA) ha kaba la sakhi ruh ia ka jingwan tuid jong ki paidbah na kylleng ki jaka.

Ha kane ka jingiakop king lieng la sakhi ruh ia ka jingwan iashim bynta da ri bapher bapher kiba kynthup napohj Sri Lanka, Switzerland, New Zealand, United Kingdom, United States of America, Czech Republic, Australia, Norway, Chile, Mexico, Germany, bad France, kata nalor phra ngut ki nongiakop king lieng kayak ba pawkhmat na Meghalaya bad uwei na Arunachal Pradesh.

Ki nongiashim bynta na ka jylla ki la paw bha ha ka thup jingiakop intermediate category ha kaba ki phra ngut ki nongiashim bynta ki la pynpaw ia la ki jong ki sap ki phong ha kane ka jingiakop. Ka jingdon bynta ka jong ki ym tang ba ka pynpaw ia ka sap ka phong jong ki trai shnong, hynrei ka pynpaw ruh halor ka jingieit jong ka thain ia ki ki jingiakop kiba iadei bad ki adventure sports bad halor ka jingkyntiew ia kiba kum kine ki jingialehkai.