Khublei kitbok u Bah PT Sawkmie ia ki 3 ngut ki khynnah ki ban leit ia aireng ha ka ‘National Karate Championship’

Syllad | The Rising MeghalayaDecember 23, 2023

U MLA barim ka Mawlai u Bah PT Sawkmie haka 23 tarik Nohprah, u la ai khublei kitbok ia ki lai ngut ki khynnah ialehkai karate na Mawlai Nongpdeng kiba la shah jied ban mihkhmat ia ka Jylla sha ka “Kaninjuku National Karate Championship 2023” ka ban long ha Khandala Maharashtra naduh nasuh 29 haduh 31 tarik mynta u bnai.

Kine ki laingut ki kynthup ia ka Barisha Kharbani, Dominica Phidahun Kharbani bad ka Esaranaki Kharjana.

Na ka liang ka Barisha Kharbani kan iashim bynta ha ka ‘individual komite’ jong ka 61kg senior katba ka Dominica Phidahun Kharbani kan iashim bynta ha ka individual kata and komite and team, kata jong ka 42kg sub Junior, katba ka Esaranaki Kharjana kan shim bynta ha ka individual kata and komite and team kata jong ka 40kg sub Junior.

Lah ban pynkynmaw ba ha ka ‘29th State Karate Championship’ kaba la kut dang shen ha kane ka nongbah, ka Barisha Kharbani ka la khur ia ka takma ksiar ha ka team kata, katba ka Dominica Phidahun Kharbani ka la khur ia ka takma rupa ha ka komite bad takma rnong ha ka kata. Katba ka Esaranaki ka la khur ia ka takma ksiar ha ka kata bad takma rnong ha ka komite.

Na ka liang u Bah Sawkmie u la ai jingiarap ruh da ka song pisa sha kine ki laingut khnang ba kin ioh ban pyndonkam ha ka jingleit jingwan jong ki.

“Nga kitbok ia baroh lai ngut kiba leit shim bynta bad kumjuh kiwei hapoh ka jingialam jong ka All Meghalaya Karate Do Association (AMKDA) ba kin ioh khur ia ka jingjop ha kane ka jingleit iakhun jong bad ba kin wanrah nam bad burom ia ka ri bad ia ka jylla hi ruh baroh kawei,” ong u bah Sawkmie.

Kumjuh na ka liang kine ki khynnah kiba la ioh pdiang ia ka jingiarap ha ryngkat kiba haiing ki pynpaw ia ka jingsngewnguh ia u bah PT Sawkmie namar watla um shym la dei shuh u nongmihkhmat hynrei u dang iai bteng ban kyrshan ia ki ha kano kano ka por ba ki donkam.