Phah khubor sngewlem ka Seng Khasi Kmie sha kiba ha ïing Rgh Diamondstone Lyngdoh Mawphlang

Syllad | The Rising MeghalayaMay 31, 2021

Ka Seng Khasi Kmie, ka dap da ka mynsiem kaba sngewkhia ban ioh ïa ka khubor halor ka jingkhlad noh jong u Rangbah Diamondstone Lyngdoh Mawphlang (uba ngi juh khot ieid  Bah Tone) ha ka 30 tarik u Jymmang 2021.

Ka Seng Khasi, kam lah ban khlem da kynmmaw lem ïa u synñiang u bynhei, ba une u Rangbah u la noh haba ïadei bad ka kam ban pynneh ban pynsah ïa ka riti, ka dustur, ka kheiñ kur, ka kheiñ kha  ka niam Khasi, ha  ka shnong Lyngkyrdem, ka thaiñ jong ka Ri-War Mihngi bad ha ka Ri Khasi hi baroh kawei.

U long da shisha u Rangbah uba trei da ka mynsiem ba shitrhem bad uba da ieng halor ka nongrim ban pynneh, pynsah ïa ki matti u mynbarim, da kaba u shim bad ban bah ïa ka lyngkor ban long syndon kum uwei na ki nongïalam ba radbah jong ka Seng Khasi.

U Bah Tone, ha ki por ba dang samla, ula long uwei na ki nongtrei ba shitrhem ban pynkhlain bad kyntiew ïa ki jingtreikam ka Seng Samla ha Seng Khasi Kmie Mawkhar ha kaba u la bat teng ruh kum u President jong ka Seng Samla, Seng Khasi Kmie, Mawkhar ha ki por ba u dang pule ha nongbah Shillong.

​Hadien ka jingleit shong noh jong u sha la shnong ha Lyngkyrdem, une u Rangbah u la aiti met bad mynsiem ban kyntiew bad pynkhlain ïa ka Seng Khasi Lyngkyrdem. Kawei na ki matti ba u une u Rangbah u la nohsynniang ha ha Seng Khasi Lyngkyrdem, kadei ha ka ban pynlong ïa ka “Maham Singh Memorial Archery Competition” man la u snem, nalor ki kam Shad, Theatre, ka jingrakhe ïa ki Tamasa jong ki Samla bad kiwei kiwei.

Nalor ka jingkit jong u ïa ka kam President, ka Seng Khasi Lyngkyrdem, une u Rangbah u bat ruh kum uwei na ki Vice President ka Seng Khasi Ri-War Mihngi, bad u la long teng u Vice President ka Lympung ki Khynnah Seng Khasi Seiñ Raij bad ha kiwei kiwei ki seng Niam Tynrai.

Kum uwei na ki  nongïalam ba la rangbah bha bad ih bha jong ka Seng, u la ïoh ruh ïa ka lad ba un wan ban ai ïa ka jingkren ba kyrpang ha ka sngi rakhe ïa ka Seng Kut Snem, ka Seng Khasi Kmie, ha u snem 2017, kaba u la ai shisha ïa ka jingkren kaba shongkhia bad ba shongsbai.

Ka jingkhlad noh jong une u rangbah, ka la long shisha ka jingduh noh kaba khraw ïa ka Seng Khasi hi baroh kawei.

Khublei Rgh Diamondstone Lyngdoh Mawphlang, leit suk bad shongsuk shong saiñ ha ryngkat ki dot ki iaw ha Dwar U Blei bad to nang kyrkhu lem na sha lyndet ïa la ka ïing ka sem bad ïa ka Seng Khasi ba kan nang lah ban jam shakhmat ha ki kam ban pynneh, pynsah ïa la ka riti, ki dustur kumba la buh bad seng maw nongrim da u ‘ men barim, ba jah.