Khur jingjop ka Rising Star bad 4-Mowkaiaw haka T20 Cricket Tournament

Syllad | The Rising MeghalayaMarch 17, 2021

Ka Rising Star bad ka 4-Mowkaïaw United ki la khur jingjop haka lympung ïalehkai kriket kaba tip kum ka Open To All T20 Cricket Tournament ba la pynïaid daka All Jaintia Cricket Association ha madan Jrisaleiñ Chutwakhu mynta ka sngi.

Haka jingïakhun ka Rising Star ka la pynliem ïaka Ummulong da 48 ron katba ka 4-Mowkaiaw United ka la pynliem ïaka Khliehtyrshi Sports Club.

Haba phai sha ka jingïakhun ka Rising Star ka la jop ïaka jingkynting pisa kumta ka la kam trai ban tied nyngkong bad ka la lah ban kamai haduh 180 ron na ki 20 overs bad hap noh 6 wiskets.

U Dawanroy Nongpluh ula kamai 71 ron (6×4 bad 5×6) khlem hap haduh bakut. U Tang Kma ula kamai 51 ron (6×4 bad 3×6). U Langmi Bamon bad u Redolanroy Shylla jong ka Ummulong ki la pynhap mar 2 wickets na ki 4 Overs.

Haba beh ïaka thong ka Ummulong ka la lah ban kamai 132 ron na ki 20 overs. U Rejoice Gassah ula kamai 27 ron (5×4). U Deep Das jong ka Rising Star ula ïoh pynhap 3 wickets na ki 4 Overs. U Dawanroy Nongpluh ula ïoh 2 wickets na ki 4 overs.

Ha kawei pat ka jingïakhun ka 4-Mowkaïaw United ka la pynliem ïaka Khliehtyrshi Sports Club.

Ïaka jingkynting pisa la jop da ka 4-Mowkaïaw United kumta ka la jied ban tied nyngkong bad kamai haduh 170 ron bad hap baroh ki wickets haki 19.1 overs.

U  Pijush Patangia ula kamai 60 ron (3×4 bad 7×6). U Ardakirang Rymbai ula kamai 30 ron (5×4 bad 1×6) katba u Rainbow Phawa bad u Conard R Sana jong ka Khliehtyrshi Sports Club ki la ïoh ban pynhap mar 3 wicket na ki 4 overs.

Ka Khliehtyrshi Sports Club haba beh ïaka thong ka la lah ban kamai tang 141 ron na ki 20 over bad hap 8 wicket.

U Conard R Sana ula kamai 55 ron (6×4 bad 4×6) katba u Joodansoon Rymbai jong ka 4-Mowkaïaw United ula pynhap 5 wickets na ki 4 overs.

Ïaka lympung la hap ban pynsangeh shwa katto katne sngi namar ba ki dkhot Executive Committee jong ka Synod Mihngi kin pynlong ka jingïalang ha Indoor Sports Hall, Chutwakhu ha ka 19 tarik mynta u bnai.