Khur ka North Liberty HSS 32 tylli ki takma, rah syndon iaka nam Over All Champion haka Inter School Athletic Meet u DSO Jowai

Syllad | The Rising MeghalayaApril 28, 2023

Ka North Liberty Higher Secondary School Jowai kala ïoh rah ïaka nam Over All Champion haka lympung ïalehkai “Chief Minister District Level Inter School Athletic Meet 2023” kaba la poi noh sha kaba kut ha madan Kiang Nangbah Stadium haka sngi Thohdieng.

Ia kane ka lympung la pyniaid da ka ophis u District Sports Officer, West Jaintia Hills District ryngkat bad ka jingiatreilang bad ka West Jaintia District Sports Association (WJDSA).

Kane ka nam lahduh ka North Liberty Higher Secondary School kala wan hadien bad la ïoh khur 18 tylli ki takma ksiar, 8 tylli ki takma rupa bad 6 tylli ki takma rnong.

Ka North Liberty Higher Secondary School ka la ïoh khur ïaka nam Best Athlete haki 5 tylli ki kyrdan kynthup iaka Under-14 Boys kaba la ioh khur da u Khrawborlang Lyngdoh, haka Under 16 Boys da u Damitre Kynjing bad Under-16 Girls la ioh da ka Deigratia Dann, haka Under-18 Boys la ioh da u Sajemiki Shylla bad haka Under-18 Girls la ioh da ka Speromeliora Langstang.

Tang kawei ka nam Best Athlete kala leit sha ka HK. Singh Memorial Secondary School haka kyrdan Under-14 Girls’ kaba la ioh khur da ka Adora Bella Syntem.

Katba ka nam Best Team la ïoh rah daki lai tylli ki skul kynthup ka North Liberty Higher Secondary School, ka Police Public School bad Govt. Boys Higher Secondary School.

Ka North Liberty Higher Secondary haka Under-14 Boys ka la ïoh khur Artylli ki takma ksiar, artylli ki takma rupa bad artylli ki takma rnong.

Haka kyrdan Under-16 Boys ka la ïoh khur Saw tylli ki takma ksiar, artylli ki takma rupa bad kawei rnong.

Haka kyrdan Under-16 Girls ka la ïoh khur san tylli ki takma ksiar bad kawei takma rupa.

Haka kyrdan Under-18 Girls ka la ïoh khur saw tylli ki takma ksiar bad kawei takma rnong.

Ka Police Public School kala ïoh rah ïaka nam Best Team haka kyrdan Under-14 Girls da kaba khur lai tylli ki takma ksiar.

Katba ka Govt. Boys’ Higher Secondary School kala ïoh rah ïaka nam Best Team haka kyrdan Under-18 Boys da kaba khur San tylli ki takma ksiar, lai tylli ki takma rupa bad lai tylli ki rnong.

Ka nam Best Discipline School la ïoh rah da ka skul St. Marys Mazzarello Girls’ Higher Secondary School.

U kongsan uba la wan ban pynhap pyrda ia kane ka lympung ialehkai ki khynnah skul u dei u MLA ka Jowai u Wailadmiki Shylla haka jingdonlang u District Sports Officer, u Khroobok Passah, u Working president ka WJDSA u EMH Passah, Patrick Lamare Vice President WJDSA ki principal bad ki nonghikai na ki skul bapher bapher ka District.