Khur takma lai ngut ki nongiakhun kti na Turkey, yn pynkup burom ka tnad sports

Syllad | The Rising MeghalayaOctober 21, 2022

U Myntri ba dei khmih ia ka tnat Sports & Youth Affairs ka sorkar jylla u bah Banteidor Lyngdoh, u la wan shakhmat ban pynpaw ia ka khmat kaba phuh samrkhie bad ka mynsiem kaba sngewkmen ba un ioh pdiang ia ka khubor ka jingioh ban khur takma jong ki kato katne ki nongiakhun kti ne ki arm wrestler ka jylla, ha ka rynsan bah ialehkai ba la tip ia ka kum ka 2022 WAF World Arm Wrestling and para arm wrestling championship ba long ha sor Antalya, Turkey.             

Kum ban shu pynkynmaw ba ka ka jingsngew sarong ia ka jaidbynriew ka la wan nyngkong eh na kong Margareth Pathaw ba dei na ka shnong Umsning kaba la ioh ban khur ia ka takma ksiar na ka iakob iakhun kaba 60 kg left hand hadien ba ka la lah ba kan pynliem noh ia ka Santos Anna ka Brazil bad hadien kane, ka khubor ka ba la ioh lum ka iathuh ba ka kong Margareth ka la ioh ruh ba kan khur wat ia ka takma rupa na ka kyrdan iakhun jong kia Masters kaba la wan hadien ba ka la lah ba kan pynliem noh ia kawei na ki thei ialehikai jong ka ri Canada.

Sa kawei ka takma ba la khur da ki nong ialehkai ka jylla ba la mihkhmat ia ka India kala wan lyngba ka Angel Mary Mylliem Umlong ha kaba ka la ioh ba kan khur ia ka takma rnong, bad kumjuh sa uwei pat u rang ialehkai ba la ioh lem ban khur ia ki takma bad u Alexander Lyngdoh, uba na Namdong, West Jaintia Hills.

U Alexander u dei u nongialehkai uba kyrpang uba duna haka bor ioh sngew ne kyllut bad uba thlun haka ktien ka thylliej, hynrei ula pynpaw sha ka pyrthei ba u don ka sap ka tbit hadien ba ula iohkhur iaka takma rnong na ka Standing Men 80 kg Hearing Impaired” Category.

Haba kren bad ki lad pathai khubor, na ka liang bah Banteidor u la ong ba ha kane ka kynti kaba mynta na ka liang ka tnat sports kala iarap ia kane ka kynhun kaba long da kylla ka burom ia ka jylla namar dei ban kynmaw ba ha kane ka kynti ki nongialehkai ka jylla ki la mihkhmat ia ka India.

Haba kylli la ka tnat kan pynlong pat ne em ia ka jingpdiang burom ia ka kine ki nong ialehkai ynda haba ki la wanphai sha la iing, u bah Banteidor u ong ba kane kadei ka kam kaba hakhmat duh, ia kaba u la ong ba da lei lei ka sorkar kan nym lah ban iaid lait ban khlem da pynkup burom ia kine ki nongialehkai, da kaba yn pynlong artad da ka jingialang.