Khur takma rupa u samla Pynshngain Kurbah na ka iakob king lieng haka Khelo India 

Syllad | The Rising MeghalayaFebruary 16, 2023

Ka Ri Bhoi Water Sports and Tourism Co-operative Society ka dap da ka mynsiem kaba kmen hadien ba u samla king lieng u Pynshngain Kurbah, uba la lah ban ialehkai bha tad haduh ba un da ioh ban khur ia ka takma rupa na ka iakob king lieng jong ka lympung ialehkai Khelo India Youth Games kaba la long ha ka wah Sahastradhara kaba ha Maheshwar, Madhya Pradeshha ka 5 bad ka 6 tarik une u bnai.

Ia kane ka jingiakob la Pyniaid ia ka da ka Indian Kayaking and Canoeing Association.

Kum ban shu pynkynmaw ba ha kane ka jingiakob ka Meghalaya ka la ioh ia ka kabu ksiar ba kan sei iala ka kynhun ialehkai ha kane ka lympung bad nalor u Pynshngain la ioh ban mihkhmat lang ruh u Batskhem.

U Pynshngaiñ Kurbah u la khur ïa ka takma rupa ha ka jingïakop king lieng jong kiba hapoh 18 snem ka rta ha kaba u la lah ban pyndep ha ki 98.310 ha ka Canoe Slalom.

Haba iadei bad kane na ka liang u coach ka Meghalaya u Ian Vincent, u pynpaw ba kine ki anrgut ki samla kidei kiba u la hikai ban pyntbit ia ki ha ka wah Umtrew bad u da sngew kmen ba u Pynshngain u la lah ba un da ioh ban khur syndon ia ka takma rupa na kiane ka kynti leit iakhun ha ka Khelo India.

U Vincent u la pynpaw ba ka jingiakob hi ka long kaba eh bad ba jwat bha, namar ka wah kaba la pynlong ia kane ka jingiakob ka lat lat ka jong ka, ka long kaba da jur bad shyrkhei bha, bad kane ka takma ba la ioh ban khur ka long ka burom bad ka jingsngew sarong ia u kum u coach bad ia ka synjuk  hi baroh kawei.

U Vincent ula bynrap ruh ba da kane ka jingioh u Pynshngain ban khur ia ka takam rupa, u khmih lynti ba ka iakob king lieng kaba kum kane, kan sa sdang ba kan kiew bad paw bha noh ha ka ka jylla.

Nalor katta u Vincent um lah ban khlem da ai khublei ia baroh kiba la don bynta ban iarap khamtam lei lei ia u Dr Vijay Kumar D (IAS) Commissioner Secretarary Tourism bad Sports & Youth Affairs ka sorkar jylla uba la iarap bor bah ba dba la lah ban pynlong ia ka kynhun ba kan poi sha kane ka  lympung  iakhun.