Khut pynman ki bor peit bor pynlai ka JSTCA, West Jaintia Hills District ya ka Dorbar yachemlang

Syllad | The Rising MeghalayaMarch 21, 2019

JOWAI: Wow ioh ya ka rai iong u waboon walang hajrong ka thong krehkam wow wanrah yei miat wei bha ionglang ki bor peit bor pynlai ka Jowai- Shillong Tourist Cab Association, West Jaintia Hills District ynne ka sngi Pynsin 21, Wisu 2019 da khut pynman ki ya ka Dorbar yachemlang wa chsien chisnem ha yung walieh ka Dorbar chnong Tpep-pale, Jwai.

U Tom H. Synnah kam u chongknor iong kani ka dorbar da kdar u wow e ki kyntien yahkhmat dei wa pdiang burom yawaroh ki dkhot ka sein kiwa da pynlait por chynnam u wan cha kani ka dorbar.

Ki mat wachim wow yaklam ha kani ka dorbar toh i khana, pynsniaw kyllum u General Secretary yei krehkam ka sein neibynta u snem 2018-19, i purae yei khein i diah wei sap i tap ka sein, i jied ya kiwa  krehkam ka sein neibynta u snem 2019-20 neitae wan da yaklam, ya tuklar leh ya kiwi kiwi ki bynta kiwa yatoh wei miat i bha wei lai beit lai ryntih ki kam ka sein.

Ki yahkhmat wa ki dkhot ka Jowai-Shillong Tourist Cab Association, West Jaiñtia Hills kiwa da jied dei monjurlang iong ka yung ha kani ka sngi neibynta u snem 2019-20 toh, U Tony Pohshna, President, u Kerkifield Lyngdoh, Vice-President, u  Jonh A.Lyndoh, General Secretary, u Abenego Passah Asst. General Secretary, u Philip Dan, Finance Secretary, u Plentiful Nongrum, Publicity Secretary, u Tom H. Synnah, Adviser, u Yooki Suiam, u Chantremiki Syad wa u Bantei Passi kam ki Auditors wei nalor kini dajied leh kam wa phra ngut ki Executive member kiwa kynthup iow Challam Suchen, John Shylla, Riraplang Paswet, Riki Dan, Mayalang Rympei, Ditros Rymbai, Amos Lyngdoh wa u Nangroi Maner.