Khut pynman yalang wa nyngkong ka WJSU, booh thong wow wanrah iei roi i par

Syllad | The Rising MeghalayaDecember 23, 2023

Hadien wada dep pynkhai im biang yaka War Jaiñtia Student Union (WJSU) da kiwa yahkhmat wa em i yoo jngai yei eh i khoo ka thaaiñ War Jaiñtia, haka 22 tarik Kmaichonglad won da pynman yalang ko ha Amlarem, West Jaiñtia Hills District nei bynta u pyrkhat yaki kam wa toh u lai chakhmat.

Ha kani ka yalang da emlang ki dkhot wa chipor ka Central Executive Committee wa kynthup nadooh u President u Namdichai Lamare, kiwa e buit ka seiñ wa kiwi.

Kamwa da ye u pynkhai im biang ya kani ka seiñ wada rim hapoh ka thaiñ War Jaiñtia, u President hawa klam ong u lyngba kani ka seiñ em ko yei angnood u wanrah biang yei burom wada wiar hapoh ka thaiñ.

Deiwa pynrap leh wa nadooh wa sangeh krehkam kani ka seiñ da yoo yei suki i treikam hapoh ka thaiñ la hei yatoh i roi i par, ka pure puthi, ki luti syngkeiñ, ki thaw sumar wa kiwi.

Neiliang u Alban K Gashnga (Chief Adviser) da e buit u yaka seiñ wow sdang noh ko u mih chakhmat wow thuh ki lad ki luti nei bynta u yaklam waka sorkar yei emkam wa dawa ne iwa chong hok u yoh ka thaiñ Amlarem Civil Sub Division.

Ong u nadooh wym em de krehkam ka WJSU ym em kawi wot leh ka ophis wa wan haka thaiñ Amlarem Civil Sub Division.

“Wei haka sorkar wa katni kamjooh kawa da lai chadien da pynku kyrdan ko chibun tylli ki Civil Sub Division, i wan sniawthooh i wa ha wom phu ye u pynku kyrdan yaka Amlarem Civil Sub Division toh u wanrah won daki ophis ba ktah yaki paidbah ka thaiñ wei kiwa toh hok u em chaka thiañ”. Ong u Alban K Gashnga

Da e u kattu katni ki nongmuna wa hei yatoh wow surok NH-44E Dawki Jowai road, ka ophis NH Sub Division kawa em ha Jowai toh u wanrah noh cha kani hi ka thaiñ.

Pynkhie im biang iaka WJSU

Hei yatoh wei hiar i pure puthi ha kani ka juk ong u i daw toh wa ki bei ki pa ka thaiñ man kiwa dooh wa duk wei juh ong ki leh ym myntoi u pynlai skur khon mynda heh ym ioh kreh tang ki. Kamte hei yatoh weini ong u emkam yow yoh haka thaiñ Amlarem yaka chnat district industrial centre nei bynta u kyrchan ko yaki khon khynroo khyllod wada stad da tip kamjooh leh ya kitu ki wom em lai pure yow ye ki u yeiñ hei yong ki i kjat.

Pynrap haroh u, hawa ya kiwi ki Civil Sub Division boon da pynku kyrdan District yi u eh yaka sorkar u pynyoh ko kini ki ophis krehkam wa toh hok haka thaiñ Amlarem nei bynta i suk i jan wei myntoi u paidbah.

Lyngba kini ki yumut ngait skhem u wa hapoh i yahkhmat u president daw thuh lad ki u yaklam waka sorkar wei hei yatoh i pure puthi leh wot kiwa wan na ki man yung wa duk leh u yoh lang ki yei tip i stad kamwa yoh kiwi.