Khynra ka KSU ia ki bar jylla ki bym don kot don sla, dawa pyntreikam ia ka ILP, MRSSA

Syllad | The Rising MeghalayaJuly 9, 2024

Ka Khasi Students’ Union (KSU) ha ka 8 tarik Naitung ka la bteng ban pynlong ka jingkhynra ia ki bar jylla ki bym don ia ki work permit bad labour licene da kaba pynher krad ruh da ki spah ngut ki nongtrei bylla bar jylla ki bym don ia ki kot ki sla kiba biang.

Ia kane ka jingkhynra ka seng ka la pynlong ha ki bynta jong ka thain Mawprem bad Mawlai kaba long ruh shibynta ban pynbor ia ka sorkar ba ka dei ban pyntreikam noh mardor ia ka line permit (ILP) bad ka Meghalaya Residents Safety and Security Act (MRSSA), 2016.

Ha shibynta jong kane ka jingkhynra ka la don ruh ka jingrah da ki placard kiba ong, ” Ngi don ia ka KHAD (Trading by Non-Tribal) Regulation, 1959. Ngi don ia ka Inter-State Migrant Workmen (Regulation of Employment and Conditions and Service) Act, 1979 kiba lah ban iakhun pyrshah ia ka jingwan rung kyrthep jng ki briew kiba na shabar ka jylla, hynrei kito kiba don ha ka bor kim kwah satia ban pyntreikam ia ki.Kumta ruh ngi na ka liang ka KSU ngi don ia ka hok ban pyntreikam ia ki ain kiba la don lypa lane ban thaw ain na ka bynta ka bha ka miat jong ka jaidbynriew haba kito kiba don ha ka bor ki la pulom ban pyndep ia kaei kaba ki dei ban leh.”

Nalor kata la sakhi ruh ia kine ki nongbylla bar jylla kiba la shah pynrah da ki placard kiba ong, “Ngi lah ban rung da kaba suk sha Meghalaya namar kadei kawei na ki jylla ka bym treikam ka ILP ha ka thain shatei lammihngi (North East) jong ka ri, bad “Nga lah ban dei u nong Bangladesh hynrei mano ban tip ne ithuh ia nga?”

Na ka liang u president ka KSU Mawpren u Aristone Thabah ula ong “Ngi la pynlong ia ka jingkhynra ia ka work permit bad shem ba don da ki spah ngut ki nongtrei bylla bar jylla ki bym biang satia ia ki kot ki sla.

“Na ka por sha ka por ngi la ju pynpaw sha ka sorkar halor ka jingdonkam ban pyntreikam noh ia ka ILP bad ka MRSSA hynrei kane kam shym la seisoh satia. Mynta kane ka jingkhynra ka dei tang ka jingsdang.Ngi phah ruh ia ka khubor kaba shai kdar sha ki kontraktor ba ki dei ban pynthikna ba baroh ki nongtrei bylla kiba ki wan ialam ki dei ban don ia ki kot ki sla kiba biang lem kumta ka Seng kan phah leitphai ia ki,” u la ong.

Katba ha ka thain Mawlai, ka KSU ka la ioh ban bat bad pynphai ia palat 117 ngut ki nongtrei bar jylla ki bym lah ban pyni ia ki kot ki sla kiba biang.