Khynra ki pulit ia ka jaka shna dawai jyrhoh thok ha East Jaintia Hills ioh kurup 9883 bitor, kem lai ngut kynthup u Ratan Dkhar na Ummulong

Syllad | The Rising MeghalayaOctober 1, 2023

Ki pulit ka East Jaintia Hills haka 30 tarik Nailur, ki la ioh ban kurup noh ia shibun bah ka dawai jyrhoh thok ne ki Phensedyl bad kem noh ki lai ngut ki briew kiba donkti na East Jaintia Hills bad West Jaintia Hills District.

Ha u kyrwoh bala phah, u Additional Superintendent of Police, East Jaintia Hills District, Khliehriat, u Bah B Jyrwa, MPS, u la ong ba ha ka 30 tarik u Nailur ba la dep ki la ioh ia ka jingtip kaba bniah ha kaba iadei bad uwei u briew uba kyrteng u Altaf Hussain uba la ioh pdiang dang shen ia kine ki dawai ba la khein beain bad buhrieh hapoh ka kudam jong u ha ka shnong Dkhiah West, Khliehriat ha East Jaintia Hills District.

Kumta ruh na ka liang ki pulit napoh Khliehriat ha ryngkat ka tnat ANTF East Jaintia Hills ki la pynlong ka jingthwet ia une u briew haduh ban ioh ban kem noh ia u. Une u briew u la ialam ia ki pulit sha katei ka kudam ha kaba ki la ioh ban kurup noh haduh 9883 tylli ki bilor dawai Phensedyl.

Nalor kata hadien ka jingphla jong u Hussain ki pulit da ka jingiarap lem ka tnat ANTF ka West Jaintia Hills ki la ioh ban kem noh ia u suba donkti ba hakhmat eh ha kane ka kam beain uba kyrteng u Ratan Dkhar uba la phla ha kaba iadei bad ka jingshna ia ka dawai jyrhoh thok hapoh ka khrum iing jong u bad ai kyrteng ia ka kum ka Phensedyl na ka bynta ban khaii beain shapoh Bangladesh.

U Ratan u la ialam ia ki pulit sha katei ka iing jong u ha kaba ki la lapdien ia 600 bilor ki dawai jyrjoh Elocydyl cough syrup (kawei kawei kaba don 100ml), 10 ki bilor jong ka flovouring agent kaba (500 ml kawei kawei), 11 ki bilor jong ki jingbam khleh rong (1 kilo kawei kawei), 10 kilo ka  Diphenhydramine Hydrochloride (ki jingkhleh na ka bynta ka Phensedyl), 1 kilo ka Chlorpheniramine Maleate (kawei pat ka jingkhleh na ka bynta ka Phensedyl), 7 tylli ki kot kiba iadei bad ki kam khleh bad shna dawai, 34 bilor ka Phensydyl (100 ml kawei kawei), 780 ki bilor Phynsedyl thylli ba 100 ml, 46 synduk ki dawai Phensedyl ba la dep ban song, 1 synduk ki jingtap bilor, 1 song ka label jong ka Phensydyl, kawei ka bottling machine, 2 kiwei pat ki mashin ban pynkhreh ia ki dawai bad filtration bad ka pisa T 11,790/-.

U Ratan u la phla ruh ba u don arngut ki paralok na Assam. Ki paralok jong u Altaf bad u Shahin kiba la iarap ban pynpoi ia kane ka dawai sha Assam ruh ki la shah kem noh. Halor kane ka jingioh kurup la rejistar case pyrshah ia kine kiba donkti hapoh Khliehriat.

Kine ki lai ngut kiba shah kem u Altaf Hussain (32 snem) udei uba na Badarpur, Karimganj Assam, Ratan Dkhar (56 snem) ba na Ummulong village, West Jaintia Hills bad ka Temporary Address ka dei Dkhiah West, East Jaintia Hills bad Shahin Rahman (32 snem), na Lathimara, Katigorah, Assam.

Ki pulit kila register iaka case pyrshah ia kine ki lai ngut ha Khliehriat Police Station katkum ka Case No. 76(9)2023 u/s 22(c)/25/29 NDPS Act bad ka jingtohkit kala iaid shakhmat ban thwet ia kiba donkti ban shalan ia kine ki dawai beain.