Khynra laisen ki pulit ia ki nongbylla bar Jylla; buh jingkylli ka KSU bym pyntreikam ka sorkar ia ka MRSSA

Syllad | The Rising MeghalayaJune 25, 2024

Ki pulit ka Anti-Infiltration Directorate ha ka 24 tarik mynta u bnai ki la pynlong ka jingkhynra ia ki nongbylla sngi bar jylla ki bym binag ia ki kot ki sla ha ka thain Nongmensong bad Mawpat.

Kiba bun na kine ki bar jylla kiba wan bylla kiba dei na Assam ki la shah bthah ban pyni ia ki kot ki sla kum ki Labour Licence, Aadhaar bad EPIC. Ki tyllong khubor ki iathuh ba 15 ngut na kine la shem ba ki dei ki bym don ia ki kot ki sla kiba biang ha ka por ba pynlong ia kane ka jingkhynra.

Na ka liang ki heh pulit ka Directorate ki la maham ia kine ki nongbylla bar jylla ba khlem kot khlem sla ba kin shah pynphai biang sha ka Jylla kaba ki wan.

Haba pyrto ia kane ka sienjam ba la shim da ka Directorate ban khynra ia ki nongtrei bar jylla, ka Khasi Students’ Union (KSU) ka la ong ba ka jingkhynra khlem da pan ia ka work permit kan long sepei namar kane ka ain ka dei kaba khang ia ki nongbylla ba kin shong kin sah hapoh Jylla.

“Kumta, ngi kyntu ia ka Anti-Infiltration Directorate ba kan bthah ia ki nongbylla bar jylla bad ki kontraktor  kiba aikam ia ki, ba kin pyni ia ki work permit lem kumta kin shah pynphai biang lane shah pynshitom kat kum ki ain” ong u samla Donald V Thabah, General Secretary ka KSU ha ka kyrwoh.

Ha kawei ka liang, u samla Donald ula ong ba na ka liang ka KSU ka kwah ban buh kylli ia ka Sorkar Jylla halor ka jinglong jingman jong ka Meghalaya Residents Safety & Security Act (MRSSA) 2016. “Kaei kaba khanglad ia ka Sorkar Jylla ban pyntreikam ia ka MRSSA haba ka Sorkar Pdeng lyngba ka Ministry of Home Affairs (MHA) kala pynphai pat ia kane ka ain sha ka Sorkar Jylla” ula buh jingkylli.

Nalor kata une u nongialam ka KSU u la ong ruh ba ka Seng kan wad ia ka daw hashuwa ba kan shim ia ka rai ban pynbor ia ka Sorkar ba kan pyntreikam noh mardor ia kane ka ain.

Shuh shuh u la ong ba ka KSU ka kwah ruh ban pynkynmaw ia ka Sorkar MDA, ioh ba ka klet halor ka jingdonkam ban buddien khlem shongthait bad ka Sorkar NDA halor ki jingdawa ba sahteng ban pyntreikam ia ka ILP, ban pynrung ia ka ktien Khasi ha ka khyrnit ba phra bad kiwei kiwei.