Khyrwit hat trick u Burom, jop ka7 Wasa 3-1 iaka Khimusniang

Syllad | The Rising MeghalayaAugust 30, 2022

U Burom Salahe ula khyrwit da ka hat trick kaba la pynlong iaka 7 Wasa Utd ban jop da 3-1 kol pyrshah iaka Khimusniang haka lympung ialehkai Super Division Football Tournament kaba pyniaid da ka West Jaintia District Sports Association (WJDSA).

Ha kane ka jingiakhun kaba long ha ka sngi Nyngkong ha Kiang Nangbah Stadium, ka 7 Wasa kala thep ia kine 3 kol haka kylla miet. Ia baroh kine ki lai kol la khyrwit da u Burom Salahe (47, 52 & 57) bad kane ka dei ka hattrick ba nyngkong jong kane ka aiom.

Ka Khimusniang kala ioh ban thep shikol ha shuwa ban wai ka kylla step lyngba u Eddie Bamon (45+1).

Da kane ka nam jop ka 7 Wasa United ka la kamai 9 poin katba ka Khimusniang ka dang kamai tang 3 poin haka jingïakhun kaba mar lai sien.

Lashai ka sngi ka jingïakhun kan long hapdeng ka Ladthadlaboh pyrshah ïaka Mynthong haka por 3.00 baje nohphai sngi.