Khyrwit hattrick u Pynishai Lathong jop ka Nangbah Mulang 4-0 iaka Khimusniang haka Super Div ka WJDSA

Syllad | The Rising MeghalayaSeptember 8, 2022

U Pynishai Lathong ula kylla long u namtam hadien ba ula khyrwit da ka hattrick bad pynjop iaka Nangbah Mulang da 4-0 kol pyrshah iaka Khimusniang haka jingiakhun Super Division Football Tournament kaba pyniaid ka West Jaintia District Sports Association (WJDSA).

Haka jingiakhun kaba long ha sngi Palei ha Kiang Nangbah Stadium ka Khimusniang kala jem khnap ha khmat ka Nangbah Mulang kaba la lah ban tynjuh bor iaka ha baroh ki liang ha kane ka jingiakhun.

U Pynishai Lathong ula lah ban ialehkai bha ha katta ka sur kaba itynnad bad ym shym la pynlehnohei ia ki kabu ksiar kiba ula ioh ban thep kol haka minit (39′,66′,77′, 79′. Kane ka hattrick kaba la khyrwit u Pynishai ka dei kaba ar ha kane ka aiom ialehkai.

Ka hattrick kaba nyngkong ruh ka mih paw haka jingiakhun pyrshah ka 7 Wasa pyrshah iaka Khimusniang. Ha kane ka jingiakhun ka 7 Wasa kala jop da 3-1. U Burom Salahe ula lah ban pynjop iaka 7 Wasa marwei lyngba ki 3 kol kiba ula thep.

Da kane ka namjop ka Nangbah Mulang kala kiew joit sha ka 10 poin (5 sien iakhun) ka Khimusniang (6 sien iakhun) kala neh 7 poin.

Ka 7 Wasa ka don haka kyrdan kaba nyngkong da kaba kamai 15 poin na ki 5 tylli ki jingiakhun bud sa ka Ladthadlaboh 10 poin, Mynthong 9 poin.

Ka Lumiawmuchai – 4 poin, ka Sohmynting 2 poin bad ka Sabahmuswang 1 poin

Lashai ka sngi Thohdieng, ka jingiakhun kanlong hadpeng Mynthong pyrshah iaka Lumiawmuchai Shangpung haka por 3 pm.