Khyrwit hattrick u Simeon bad u Dowell, jop suk ka Ladthadlaboh iaka Sohmynting haka Super Division ka WJDSA

Syllad | The Rising MeghalayaSeptember 18, 2022

Ka jingiakhun kaba khatduh jong ka wat kaba nyngkong kaba la poi noh sha kaba kut da ka namjop ka Ladthadlaboh 7-1 iaka Sohmynting haka Super Division Football Tournament kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka sngi Saitjain.

Ha kane ka jingiakhun ka Ladthadlaboh kala jop suk iaka Sohmynting, ka ban ialehkai noh haka aiom ban wan haka kyrdan 1st Division hadien ba kam shym la lah ban ialehkai bha mynta ka aiom ialehkai ryngkat bad ka Sabahmuswang kiba la kamai mar 1 poin na ki 7 sien iakhun.

Haba ohai sha ka jingakhun ka Ladthadlaboh kala tam sha khmat 1 kol tang hapoh 2′ minit bala iaid ka jingiakhun. Ia kane ka kol la thep da u Nitejan Pala. Ka Sohmynting kala ioh thep shi kol haka minit kaba 15′ lyngba Deiwomsa Shylla.

Dei haka kylla miet ka Ladthadlaboh kala nion ha baroh ki liang iaka kut ialehkai ka Sohmynting bad la lap ba lut lyer ki pleiar jong ka bad kim lah shuh ban tehlam iala ka jong ka kut ialehkai bad ki kol kila mih kumba mih u slap u phria.

Ki ar ngut ki nongialehkai ka Ladthadlaboh, katta u Simeon Suchiang (48′, 55′, 70′ bad u Dowell John Shylla (49′, 62′, 90′) kim shym la pynlehnohei iaka kabu ksiar kaba kila ioh bad kila khyrwit mar kawei ka hattrick kaba la biang pura iaka Ladthadlboh ban khur iaka namjop kaba bun kol.

Da kane ka namjop ka Ladthadlaboh kan mih madan ban aireng pyrshah iaka 7 Wasa haka semi final kaba nyngkong ne ka Qualifier-1 haka 23 tarik une u bnai.

Ka semifinal kaba ar ne ka Eliminator kan long hapdeng ka Mynthong pyrshah iaka Nangbah Mulang haka 24 tarik bad ka semifinal kaba lai ne ka Qualifier 2 kan long hapdeng ka kynhun kaba shah rem haka semifinal kaba nyngkong pyrshah iaka jop haka semifinal kaba ar.