Ki adong adit shnong ka Panaliar Jowai ap ka kuna kaba haduh 70 hajar, buskit T.4 hajar iaki nongai jingtip

Syllad | The Rising MeghalayaAugust 26, 2022

Ban iakhun pyrshah iaka jingsniew ka imlang sahlang kiba la kynrei bha mynta ki sngi khamtam na ka jingjyllei ki nongdih bad nongkhaïi drok, ka Dorbar Shnong Panaliar Jowai kala pynmih iaka adong adit shnong kaba pyrkhing bad ka pynap ruh da ka kuna kaba la kot haduh T.70 hajar nalor ban kan aiti sha ki bor jong ka aiñ.

Kane ka dong adit shnong, ka jingthmu ka long ban iakhun pyrshah iaka jingsniew ka jingdih iaki kynja jingdih pynbuaid ba kynthup iaka kyiad, drok bhang bad kiwei kiwei hapoh u pud u sam jong ka shnong Panaliar.

U Waheh Shnong ka Panaliar u Ma Riquoma Rq. Laloo ula khot la wer ïa baroh ki paidbah ban ïatreilang bad ka Shnong Panaliar ban wanrah ka shongsuk shongsaiñ bad jingbha jingmiat ïa baroh lang.

Ula ong ka shnong Panaliar naduh mynshwa ka don ïaki aiñ shnong kiba dang trei haduh mynta kiba khang pyrshah ban die ïa kino kino ki jait jingdih pynbuaid khamtam ka kyiad, u Drugs bad kiwei kiwei.

Ia kiba die kyiad beaiñ ka kuna kalong T.20 hajar tyngka katba ïa u nongthied yn shaiñ kuna T. 10 hajar tyngka. Ïaki nongdie drugs ka kuna kalong T.50 hajar tyngka bad aiti ruh sha ka aiñ, ong u ma Laloo.

Ula kyntu ïa baroh ki nongshong shnong bad ki lok kiba najan najngai ba lada ki ïoh jingtip eiei shaphang ki nongdie nongthied ban pyntip sha ka Dorbar shnong bad ka Dorbar shnong kan ai buskit T.4 hajar tyngka bad ïaka kyrteng jong ki nongpyntip yn buhrieh.

Ka Dorbar shnong Panaliar ka khang pyrshah ruh ïaki Wine Store kiba pynpoi kyiad hapoh u pud u sam jong ka shnong ne Home delivery khlem da ïoh jingbit shwa na ka Dorbar shnong. Kino kino ki wine store kiba leh pyrshah ka shnong kan pynduh ïaka permit jong ki.

Shuh shuh la mana ruh ïaki riew shimet, ki sengbhalang, seng Niam, ki dong ne Shnong ba kim ym bit pynlong kino kino ki kynja jingïalang ne prokram paidbah khlem da ïoh NOC na ka Shnong Panaliar.

Ka Dorbar shnong ka la khang pyrshah ruh ïaki lok ki jor kiba wan da ki kali motor ban bret pathar ïaki klong, ki bilor kyiad bad ki jakhlia jakhlait hapoh shnong poh thaw.

Haba ïadei bad ki nongdie dukan hapoh u pud u sam jong ka Dorbar shnong la shah ba kin die tang haduh 10.30 baje mynmiet bad kino kino ki dukan kiba leh pyrshah kin hap ban siew ïaka kuna ryngkat ka jingpynshitom.

La khang ruh ïa kino kino ki kali ban pynheh sur, ñiah sted haba ïaid haki surok shnong bad la kyntu ïaki nongleit nongwan ban shim ïaki number plate bad ban pyntip sha ka Dorbar shnong.