Ki ar tylli ki mall ha Jowai ki dei kiba dei trai da ki Pnar, rai ka synjuk waheh shnong ba nym ai NOC pathar

Syllad | The Rising MeghalayaNovember 6, 2021

Ka Synjuk Waheh Shnong Jowai da kawei ka sur kala rai ban ai jngthoh sha baroh ki waheh shnong ha sor Jowai ban nym ai NOC pathar sha ki bar jylla ne company kiba thmu ban wan khaii pateng ha rilum Jaintia khamtam hapoh sor Jowai.

Ia kane ka rai la shim haka jingialang kaba long hadpeng ka seng ki nongkhaïi ka Jaintia Tribal Trader’s Association (JTTA) bad ka Synjuk Waheh Shnong Jowai ha ïungwalieh ka dorbar shnong Iongpiah haka sngi Saitjain.

Haba kren bad ki nongthoh khubor u President ka Synjuk Waheh Shnong Jowai u Ma Alan Niangti ula ïathuh ba ka Synjuk haka jingïalang kala rai ban ai da ka jingthoh sha baroh ki dorbar Shnong hapoh ka sor Jowai ba kim dei ban ai NOC klumar sha ki bar Jylla khlem da bishar bniah ia ki jait kam ba thmu seng ne buh da ki bar jylla ne company khamtam iaki jingtrei kiba lah ban trei da ki trai ri trai muluk.

U Ïatha Najiar President JTTA ula ïathuh ba na ka por sha ka por kila kyntu ïaka Jaintia Hills Autonomous District Council (JHADC) ban nym ai Trading License pathar sha ki bar Jylla namar ka ktah ïaka khaïi ka pateng jong ki trai muluk. Ula ong baka jubab kaba ki ioh na ka konsil kalong ba kam lah ban leh eiei lada ka bor shnong ka ai iaka NOC kynthup iaki jait kam ba lah ban trei da u trai jylla.

Dei halor kane ngi na kaliang ka JTTA kala kyrpad iaka synjuk waheh shnong Jowai ban khot iaka jingiakren halor ka jingai NOC sha ki bar jylla, la ong u Ma Najiar bad u Kyrmen ba kane ka jingiakren kan treikam khnang ban tehlakam iaka jingwan khaii pateng ki bar jylla ha rilum Jaintia.

Ki ar ngut ki waheh shnong kiba kynthup iaka Ladthadlaboh bad ka Loomsooiung Newhill, Jowai ba don ia ki ar tylli ki mall ba kynthup iaka Family Mart bad ka V Mart, kila kam ba kine ki mall ki dei kiba wan pan NOC da ki Pnar. “Ki don ki kyndon jong ka shnong kiba la buh ban thungkam iaki nongshong shnong bad iaka NOC ruh la ai da ka jingmynjur ka dorbar shnong,” la ong LD Lakiang, waheh shnong Ladthadlaboh.