Ki briew ha khappud India-Bangla ki mad bun ki jingeh; tang u nongialam ba tbit u lah ban weng: CM Conrad

Syllad | The Rising MeghalayaFebruary 18, 2025

U National President ka National People’s Party (NPP) bad Myntri Rangbah ka Jylla, u Conrad K Sangma u la ong ba ki briew kiba shong ba sah ha ki thain khappud India-Bangladesh ki mad ia bun ki jingeh bad tang u nongialam uba tbit uba lah ban weng ia kine ki jingeh ki jong ki.

Ia kane u Conrad u la pynpaw haba kren ha ka jingialang ialap elekshon ha ka 17 tarik Rymphang ha Dalia hapoh Shella constituency ban pan jingkyrshan ia u kyrtong ka NPP u Bah Ethan Kharpuri ha ka jingwan sakhi jong ki hajar ngut ki paidbah.

“Ka elekshon ka ban wan sha ka KHADC ka la ailad ia ki nongshong shnong ka 11-Shella constituency ba kin jied ia u nongialam u ban long ka sur jong ki bad pyniajan hapdeng jong ki bad ka sorkar. U MDC ym tang ba un mihkhmat na ka bynta jong ki ha ka Council, hynrei un pyniasoh ruh ia ki paidbah ka Shella bad ka sorkar,” ong u Conrad

Haba kyntu ia ki paidbah ban jied ia u kyrtong ka NPP u Ethan Kharpuri hadien ba u la sngap ia ki mat ba la pynpaw da ki nongkren bapher bapher ha ka jingialang, u Myntri Rangbah u la ong, “Ban weng ia kine ki jingeh, ngi donkam ia u nongialam uba shemphang, uba sngewthuh ia ki jingeh jong ngi bad uba lah ban weng ia ki. To ngin pyndonkam ia ka elekshon KHADC ban jied ia u kyrtong jong ka party jong ngi.”

U la pynkynmaw ruh ia ki paidbah nongjied halor ki jingkular ba hashwa jong u ban pyniasoh ia ka Shella bad ka Sohra lyngba ka surok kaba lah ban iaid ha baroh ki samoi, kata ia kaba mynta la dep ban shna. U la pyntip ruh ha katei ka jingialang shaphang ki rukom jingiarap bad jingkyrshan bapher bapher kiba la pynpoi sha ki paidbah ka Shella bad kiwei kiwei ki thain khappud jong ka jylla Meghalaya.

“Ka NPP ka ngeit ha ka roi ka par kaba kynthup lang ia baroh. Ngi la kular ia ki paidbah jong kane ka jylla ban sdang ia ki prokram ai jingmyntoi bad ban pynthikna ia ka roi ka par kaba pura jong baroh ki jaidbynriew. Ka jingroi jong ka jylla ka shong ha ka jingbha jingmiat jong ki briew jong ka. Ngi ngeit ha ki briew jong ngi bad ngi aiti lut ban weng ia ki jingeh jong ki, la ka long ha ka pule puthi, ka koit ka khiah, ka roi ka par. Ka party jong ngi ka la buh ruh hakhmat eh ban kyntiew ia ko nongrep bad ban thaw ia ki lad ki lynti na ka bynta ki samla bad ki kynthei. Ngi shimkhia na ka bynta ka roi ka par jong ka jylla Meghalaya baroh kawei,” u la bynrap.

Haba kren halor ki jingeh kiba ki iakynduh na ka bynta ban ioh ia ki ID thep vote, khamtam ha ki jaka khappud, u CM u la pynpaw ba ka sorkar NPP ka la pynbeit ia katei ka jingeh. “Ngi ngeit ba ki briew jong ngi, ha kano kano ka jaka ba ki shong ki sah, ki dei ban ioh ia ka hok bad ka jingmyntoi jong kane ka ri.”

Haba pynpaw halor ki jingshah kynthoh ha ki party liang pyrshah, u Conrad u la ong ba wat hapdeng ki jingpyrshah ki jong ki, hynrei ki dang donkam ia ka jingtuklar jong ka sorkar ba la ialam da ka NPP ha kaba iadei bad ka roi ka par lane ban pynbeit halor ki jingeh.

“Wat sheptieng ia kito ki seng sain pyrthei kiba kren pyrshah ia ngi. Ngi don ha ka sorkar synshar, bad hadien ka elekshon, baroh ki seng kin shaniah ha ka NPP ban pynbeit ia ki jingeh jong ki. Jubab ia ki da ki vote jong phi bad ai ba kin tip ba ngim sheptieng ia ki jingkren jong ki,” ong u Myntri Rangbah.

“Hadien 50 snem, ka NPP ka la thaw biang ia ka histori da kaba don haduh 32 ngut ki MLA bad thaw ia ka sorkar pura kaba buid paid. Ngim donkam ia ka jingkyrshan jong kiwei pat ki seng saiñpyrthei, hynrei ngi dang iaineh bad ki paralok ba iatreilang jong ngi. U nongialam ba shisha um ju iehnoh ia la ki briew,” u la ban jur.