Ki bym kohnguh ïaki Aiñ yn pynshitom da kaba set byndi & ka kuna ong u DC East Jaiñtia Hills

Syllad | The Rising MeghalayaApril 14, 2020

U Deputy Commissioner, East Jaintia Hills District u pynbna paidbah ba la pyntreikam ia ki aiñ bad kyndon ki ba kynthup ia ka Disaster Management Act, 2005, Ka Indian Penal Code, Ka Epidemic Disease Act, 1897 bad ka Essential Commodities Act, 1995 hapoh District baroh kawei.

Ia kane ka khubor lai ai khnang ban pyntip bad pynshai ia ki paidbah halor ki jingpynshitom haka ba iadei bad kine ki ain.

Katkum ka section 51. (b) jong ka Disaster Management Act,2005, ka jingpynshitom ka long naka bynta kito ki bym kohnguh ia ki jingmana jong ka Sorkar bad ki lah ban shah set patok haduh shisnem lane bad ka kuna lane baroh ar. Lah ruh ban shah set haduh ar snem.

Ha ka section 52 ka jingpynshitom ka dei na ka bynta kito kiba kam da ka ba shu thok, ki lah ban shah set patok haduh ar snem ryngkat bad ka kuna. Na ka bynta ki ba pyndonkam bakla ia ka pisa ne ia ki mar ki mata kin sha pyn ngat ha ka section 53 bad ka jingpynshitom ka long ba ki lah ban shah set patok haduh ar snem  ryngkat bad ka kuna.

Katba, ka section 54 jong kane ka ain kan pynshitom ia kiba pynbna bakla bad ki ba ngat ha kane ka section lah ban shah set patok haduh shisnem lane ka fine.

Ha ka ba iadei bad ka section 188 jong ka Indian Penal Code ka jing pynshitom katkum kane ka ain ka long na ka bynta ka jingbym kohnguh ia ki hukum ka Sorkar, ki nongleh pyrshah ki lah ban shah set patok shibnai lane shain kuna lane hynriew bnai ryngkat bad ka kuna lane baroh ar.

Kumjuh ruh, ha ka section 3 jong ka Epidemic Disease Act, 1897 la pynshai ba kino kino ki ba ialeh pyrshah kin shah pynshitom katkum ka section 188 jong Indian Penal Code.

Shuh shuh, la pyntreikam ruh ia ka Essential Commodities Act, 1995 bad ka section 7 jong kane ka ain kan pynshitom ia kiba pynkhein ia ka section 3, ia ki briew ki ba pynkhein, lah ban shah set patok haduh shisnem ryngkat bad ka fine bad lah ruh ban shah set patok ym duna ia ka 3 bnai kaba lah ban poi shaduh 7 hynniew snem ryngkat bad ka fine. Lada pynkhein 2 ar sien ia ka juh, lah ban shah set patok ym duna ia ka 6 bnai ka ba lah ban bteng shaduh 7 snem ryngkat bad ka fine.  DPRO