Ki college kiba hap haka People’s College ka sorkar ka dei ban buh dor iaka bai klas: JSM

Syllad | The Rising MeghalayaAugust 29, 2022

Ka Jaintia Students’ Movement (JSM) kala ong ba ki college kiba la kynthup haka People’s College Scheme ka sorkar ka dei ban buh dor iaka bai klas ki khynnah ne samla pule khnang ban long ia ryngkat bad ki college kiba pyniaid da ka sorkar.

Lada ka sorkar kam pynbeit iaka dor jong ka bai klas ka jingmut ka People’s College kan kylla sha wei bad kan long ruh tang kum ki Political College, la ong ka JSM haka dorkhat kaba la ai sha u Myntri ka tnad Pule Puthi Ma Lahkmen Rymbui haka jingpynkup burom iaki samla kiba pass bha haka SSLC, HSSLC kaba long ha Tpeppale, Jowai.

“Ngi dawa ruh ruh ba ki dei ban don ki nongmihkhmat ne ophisar jong ka sorkar haka Governing Body/Managing Body jong ki college kiba kynthup haka People’s College,” ong ka JSM haka dorkhat.

Ka dorkat ka ong shuh shuh ba “Lada ka sorkar ka siew iaka tulop ki nonghikai hapoh ka People’s College, balei ka sorkar kam shna ne wanrah iaki College Sorkar.”

Ka JSM ka ba ka jingsdang iaki People College scheme haka jaka ban shna iaka Government College ka khang lad ia ki samla kiba la nang la stad ban iohkam iohjam ha kaban long lecturers bad kumjuh iaki samla pule ha ki College Sorkar thymmai.

Kiwei kiwei ki jingdawa kiba ka JSM kala buh ha khmat u Myntri ka tnad Pule Puthi ka long ban wanrah iaka Job Coaching Centre ne ka shlem ai jinghikai ba kyrpang ïa ki samla wad kam wad jam ha Ri lum Jaintia. Ban wanrah iaka centre MPSC ha Jowai ban pynsuk iaki nongialehkam.

Ka JSM ka dawa ïa ka jingpyntreikam noh ïa lai residential schools ha West Jaintia Hills, Engineering College ha Thadmuthlong bad ka Science College ha Mustem bad ka Pine Mount International School ha Wahiajer.

Ka JSM ka ong ba ki nongshong shnong ki la dep ai sngewbha ïa ka jaka na bynta kitei ki jaka pule naduh mynno hynrei haduh mynta kim pat ïeng satia ki jaka pule.

Haba jubab ïa katei ka memorandum, u Ma Lahkmen ula ong ban sdang ïaka Kolej sorkar kam dei kaba suk hynrei sngewtynnad ba ka Ri lum Jaintia kadei kaba donbok ban don 3 tylli ki People’s College haka jinglut kaba 10 klur tyngka shisnem.

Haba ïadei bad ka bai Kolej ne Fees haki 3 tylli ki People’s College, u myntri ka tnat Pule ula kular ba ka sorkar kan sa peit ne khmih biang ne “Relook” ïa kane ka mat khnang ba kitei ki kolej kin nym kamai profit ha ka jingduhnong ki samla pule.